Гародня: 27 беспрацоўных на 1 вакансію
Паводле афіцыйных дадзеных, на Гарадзеншчыне сем тысяч чалавек працуюць у рэжыме няпоўнай працоўнай занятасці. Гэта адбываецца ў сувязі з аптымізацыяй працы суб’ектаў гаспадарання і спыненнем дзейнасці прадпрыемстваў.
Як зазначае намеснік начальніка Упраўлення па працы, занятасці і сацыяльнай абароне насельніцтва Гарадзенскага гарвыканкама Аксана Флёрка, складаная эканамічная сітуацыя ў рэгіёне не спрыяе паляпшэнню сітуацыі на рынку працы, а службы занятасці не ўстане дапамагчы ўсім жадаючым. Асабліва гэта датычыць абласнога цэнтра:
– На 1 вакансію прэтэндуе 27 беспрацоўных. Наглядаецца рэзкае павелічэнне рэгістрацыі беспрацоўных, адпаведна, павялічылася і колькасць тых, каго рэгіструем. Павялічылася і напружанасць на рынку працы. Асноўная праблема сёння – гэта праблема мужчынскай занятасці.
Гарадзенскія ўлады ў межах барацьбы з беспрацоўем распрацавалі план мерапрыемстваў, накіраваных на падтрымку занятасці насельніцтва ў 2016 годзе. На яго рэалізацыю плануецца выдаткаваць больш за два мільёны даляраў. Грошы будуць накіраваныя на выплату дапамогі беспрацоўным і іх перападрыхтоўку, а таксама аплату грамадскіх працаў.
Беларускае Радыё Рацыя, Гародня
Фота s13.ru
