«Газпром»: Зніжка цаны на газ для Беларусі пакуль не прынятая
Расейскі бок пакуль не прыняў рашэнне аб зніжэнні цаны на газ, што пастаўляецца Беларусі, паведаміў 25 сакавіка журналістам у Менску намеснік старшыні праўлення ААТ «Газпром» Андрэй Круглоў.
«У цяперашні час мы кіруемся міжурадавым пагадненнем і заключаным кантрактам. Мы са свайго боку зыходзім з таго, што дамоўленасці існуюць, і разлічваем на іх выкананне», — сказаў намеснік кіраўніка «Газпрома».
Разам з тым, паводле яго слоў, працягваюцца «пэўныя кансультацыі» паміж бакамі. «З боку нашых беларускіх калег было пажаданне аб зніжэнні цаны на газ, але пакуль, наколькі мне вядома, ніякіх рашэнняў не прынята. А паколькі такіх рашэнняў не прынята, мы зыходзім з дзейных дамоўленасцяў і кантрактаў», — завіў Круглоў.
Як раней паведамлялася, 2 сакавіка ў Маскве прайшлі перамовы віцэ-прэм’ера Уладзіміра Сямашкі з расейскім калегам Аркадзем Дварковічам, а таксама паміж міністрамі энергетыкі дзвюх краін Уладзімірам Патупчыкам і Аляксандрам Новакам. Паводле звестак расейскага «Коммерсанта», Беларусь просіць у Расеі часовую зніжку на прыродны газ. Пры гэтым крыніцы кажуць пра два варыянты зніжэння цаны: зніжку 25 даляраў з базавай цэны кантракта або дысконт да канчатковай цаны кантракта.
13 студзеня Дварковіч і Сямашка ўжо правялі перамовы па гэтым пытанні, аднак не змаглі дасягнуць згоды. Намеснік міністра энергетыкі Беларусі Вадзім Закрэўскі раней заявіў, што яго ведамства разлічвае на зніжэнне цаны расейскага газу ў 2016 годзе больш чым на 10 даляраў за 1 тыс. кубаметраў. Хоць, паводле яго слоў, і цяпер яна прымальная — 142,37 даляра за 1 тыс. кубаметраў.
Паводле БелаПАН
Глядзіце таксама
