Грамадзяне Беларусі атрымаюць права свабодна размяшчаць дэпазіты за мяжой
Палата прадстаўнікоў 21 мая прыняла ў другім чытанні законапраект «Аб валютным рэгуляванні і валютным кантролі», які дае фізічным асобам права свабодна адкрываць дэпазіты за мяжой, паведаміў журналістам намеснік старшыні пастаяннай камісіі па бюджэце і фінансах Палаты прадстаўнікоў Пётр Вабішчэвіч, адказваючы на пытанні БелаПАН.
«Законапраект прадугледжвае лібералізацыю валютнага заканадаўства, спрашчэнне правядзення валютных аперацый фізічнымі і юрыдычнымі асобамі, адмену выдачы дазволаў Нацбанкам на правядзенне валютных аперацый», – расказаў Вабішчэвіч.
У выпадку прыняцця дакумента Палатай прадстаўнікоў, Саветам Рэспублікі і ўхвалення кіраўніком дзяржавы ён набудзе моц на працягу года, адзначыў дэпутат.
У законапраекце адмененыя практычна ўсе абмежаванні, якія ў нас дзейнічалі апошнія гады, дадаў Вабішчэвіч. У прыватнасці, фізічным асобам будзе дадзена права свабодна, без неабходнасці атрымання дазволу Нацбанка, адкрываць дэпазіты за мяжой, адзначыў ён. «У гэтым ніякага страху і рызыкі няма. Вопыт краін, якія з’яўляюцца нашымі суседзямі, улічваўся пры распрацоўцы законапраекта. Прадстаўнікі Нацыянальнага банка (распрацоўшчыкі законапраекта) упэўненыя, што дакумент дазволіць бізнесу больш свабодна прыходзіць у Беларусь і створаныя ўмовы дазволяць укладваць інвестыцыі з большай выгадай, чым у суседніх дзяржавах», – падкрэсліў дэпутат.
Праект новай рэдакцыі дакумента «Аб валютным рэгуляванні і валютным кантролі» быў прыняты Палатай прадстаўнікоў у першым чытанні восенню мінулага года. Ён прадугледжвае адмену дазвольнага парадку правядзення аперацый фізічнымі асобамі, звязаных з рухам капіталу. Таксама адмяняецца дазвольны парадак адкрыцця рахункаў для юрыдычных асоб.
Акрамя таго, юрыдычным асобам будзе дадзена права самім вызначаць тэрміны вяртання валютнай выручкі ў знешнеэканамічных дамовах (цяпер іх вызначае заканадаўства). Пры гэтым у законапраекце ўстанаўліваецца абавязак рэгістраваць рэзідэнтаў валютныя дамовы на інтэрнэт-партале Нацбанка і падаваць звесткі па зарэгістраваных валютных дамовах.
Глядзіце таксама
