Імпартныя лекі могуць знікнуць з айчынных аптэк
З беларускіх аптэкаў могуць знікнуць імпартныя лекі, аналагі якіх ёсць у Беларусі. Пра гэта паведамляецца на сайце Хартыя-97. Імпартныя лекі, паводле інтэрнэт-рэсурсу, ужо не прымаюцца ў айчынныя кантрольна-аналітычныя лабараторыі на хімічны аналіз. У аптэках пакуль пра гэта не ведаюць. А бальніцы ўжо год працуюць толькі на беларускіх леках, адзначыла нам берасцейская лекарка:
– Нашы лекі значна таннейшыя за імпартныя. З уласнага досведу магу сказаць, што ўжо цягам года ў нашай бальніцы ўсе на беларускіх прэпаратах. І лечацца людзі. А калі не папраўляецца чалавек, то тут і імпартныя лекі не дапамогуць.
Людзі па-рознаму ўспрымаюць такую інфармацыю. Некаторыя лічаць адсутнасць выбару лекаў дыскрымінацыяй:
– Давяраю беларускім вытворцам. Дарэчы, і цана добрая, а склад той жа самы, што ў імпартных.
– Нашы лекі брудныя, проста брудныя. Імі проста немагчыма лячыцца. У мяне мама на гармонах, таму я ведаю, пра што кажу. Прынамсі нашымі беларускімі гармонамі карыстацца проста немагчыма. У іх настолькі шмат пабочных эфектаў, што прасцей памерці.
– Тое, што рэжым закрывае імпарт лекаў, сведчыць пра тое, што ён хоча быць манапалістам на гэтым рынку. Зноў жа, вядома, у Беларусі ажыццявіць кантроль якасці лекаў, прасачыць, з чаго яны робяцца, па якіх стандартах, наколькі яны лекі і якая ад іх шкода, проста немагчыма.
Праваабаронца з Берасця Уладзімір Вялічкін магчымую адсутнасць імпартных лекаў лічыць праблемай. Да праваабаронцаў па дапамогу звяртаюцца інваліды, якім лекары адмаўляюцца выпісваць бясплатныя імпартныя лекі. Выпісваюць толькі беларускія.
Беларускае Радыё Рацыя
Фота notasincreibles.net
Глядзіце таксама
