Кабякоў: Нас атачаюць краіны і аб’яднанні з моцнай эканомікай
Беларусь чакае сур’ёзных зрухаў у ліквідацыі выключэнняў і абмежаванняў ва ўзаемным гандлі ў ЕАЭС. Пра гэта заявіў прэм’ер-міністр Андрэй Кабякоў на пасяджэнні Еўразійскага міжурадавага савета 13 красавіка ў Маскве.
„Беларусь прытрымліваецца думкі, што галоўная мэта — гэта ліквідацыя выключэнняў і абмежаванняў ва ўзаемным гандлі, — сказаў ён. — У сувязі з гэтым прапаную вярнуцца да нашай ідэі сабраць прапановы бакоў па першачарговым спісе 10—20 выключэнняў і прыняць меры па іх аператыўнай ліквідацыі. Беларускі бок чакае сур’ёзных зрухаў у гэтай працы ў сувязі са структурнымі пераўтварэннямі ў камісіі — прызначэннем члена Калегіі ЕЭК па пытаннях функцыянавання ўнутраных рынкаў і стварэннем адпаведнага дэпартамента”.
Таксама, паводле слоў Кабякова, беларускі бок чакае ўзмацнення каардынуючай ролі ЕЭК пры вырашэнні ўнутраных супярэчнасцяў паміж дзяржавамі ЕАЭС. Гэта датычыцца ў тым ліку пытанняў забеспячэння свабоднага гандлю і допуску да дзяржаўных закупак, тарыфнай і нетарыфнай абароны ўнутранага рынку ЕАЭС, асабліва ва ўмовах далучэння новых дзяржаў да саюза і ўступлення Казахстана ў СГА.
Кабякоў адзначыў, што цяпер у ЕАЭС ідзе „актыўная праца на знешнім контуры, прычым як на ўсходнім, так і на заходнім вектарах”. „Прайшоў усяго год функцыянавання, а саюз ужо набывае абрысы не проста інтэграцыйнага аб’яднання, — сказаў ён. — І гэта правільны кірунак. Свет ужо нават не дзеліцца, ён падзяліўся на блокі. Нас атачаюць краіны і аб’яднанні з моцнай эканомікай. Задача ЕАЭС — заняць годнае месца сярод іх”.
Але, каб уключыцца ў такую працу, ЕАЭС патрэбны моцны падмурак унутры самога саюза. Менавіта таму Еўразійская эканамічная камісія ў сваёй працы павінна зыходзіць з пазіцыі пераемнасці ў вырашэнні задач, лічыць беларускі прэм’ер-міністр.
