Каля Курапатаў будуюць жылы комплекс з пентхаусамі
У Менску працягваецца забудова жылога комплексу «Сонечны» насупраць Курапатаў. МАПІД ужо завяршыў мантаж каробкі першага дома, пачаў будаўніцтва другога і падрыхтаваў пляцоўку пад трэці, паведамілі ў «Мінскбудзе».
Новы комплекс будуецца ўсяго за кіламетр ад МКАД, насупраць урочышча Курапаты і гандлёвага цэнтра «Экспабел».
МАПІД пазіцыянуе яго як жыллё камфорт-класа з новым фарматам кватэр – ад невялікіх да пентхаусаў з уласнымі тэрасамі. Вышыня столяў складзе 2, 88 м.
Як абяцае забудоўшчык, тут з’явяцца аб’яднаныя з гасцінымі кухні, халодныя каморы, электраацяпленне і пакватэрная сістэма рэкуперацыі, закрытыя ад машын панадворкі і месцы для адпачынку. Для кожнай сям’і выдзеляць парковачнае месца ў цокалі. Жыллё абяцаюць здаваць без аздаблення, затое практычна з ідэальнай паверхняй пакояў.
МАПІД ужо завяршыў мантаж каробкі першага 78-кватэрнага дома, зараз тут устанаўліваюцца аконныя блокі і ліфтавае абсталяванне, вядуцца электратэхнічныя і сантэхнічныя работы. Пачата будаўніцтва і другога дома, а па суседстве падрыхтавана палевае поле пад трэці.
