Кантэйнерныя перавозкі з Кітая ў Еўропу праз Беларусь выраслі ўдвая
Кантэйнерныя перавозкі з Кітая ў Еўропу праз Беларусь у 2017 годзе выраслі ўдвая. Аб гэтым заявіў начальнік Беларускай чыгункі Уладзімір Марозаў, размаўляючыся сёння з журналістамі ў Маскве на круглым стале „Транзітны патэнцыял Рэспублікі Беларусь у забеспячэнні перавозак расейскіх знешнегандлёвых грузаў”.
Уладзімір Марозаў адзначыў, што за няпоўны год з Кітая ў Еўропу праз Беларусь праехала каля 3 тыс. цягнікоў. У наступным годзе чакаецца таксама далейшы рост аб’ёмаў перавозак у Еўропу.
Уладзімір Марозаў падкрэсліў важнасць для БЧ расейскага транзіту праз Беларусь: у яго агульным аб’ёме 87 працэнтаў складаюць грузы з Расеі. У параўнанні з мінулым годам у 2017-м аб’ём транзіту павялічыўся амаль на чвэрць. Гэта звязана перш за ўсё з ростам расейскай і беларускай эканомік.
На пасяджэнні Надзвычайны і Паўнамоцны Пасол Беларусі ў Расіі Ігар Петрышэнка адзначыў, што тэма транзіту надзвычай актуальная для Беларусі з-за значнасці транспартнага складніка для яе эканомікі. Транспартны сектар займае каля 6 працэнтаў у ВУП краіны, садзейнічае развіццю ўнутранага і знешняга гандлю. На транспартныя паслугі прыпадае палавіна агульнага аб’ёму экспарту паслуг краіны. Згодна з праграмай развіцця лагістычнай сістэмы і транзітнага патэнцыялу на 2016-2020 гады, даходы ад транзіту да 2020 года плануюцца на ўзроўні $1,5 млрд.
„Беларусь, як удзельніца ЕАЭС, размешчаная на скрыжаванні дарог да Балтыйскага і Чорнага мораў, паміж моцнымі эканамічнымі ігракамі, такімі як Кітай і ЕЗ, нацэлена на ўдзел у рэалізацыі буйных міжнародных інфраструктурных праектаў, – сказаў Ігар Петрышэнка. – Наша краіна актыўна падтрымала ініцыятыву стварэння Эканамічнага пояса Шаўковага шляху, стаўшы вузлавой кропкай гэтага праекта. Зацікаўлена ў нарошчванні аб’ёмаў тавараў, якія перамяшчаюцца ў напрамку з Еўропы ў краіны Азіяцка-Ціхаакіянскага рэгіёна і назад”.
У гэтых мэтах прадаўжаецца паслядоўная рэалізацыя мерапрыемстваў па стварэнні транспартна-лагістычных цэнтраў, развіцці тэрмінальнай і складской інфраструктуры з шырокім спектрам мытнага абслугоўвання і дапаможнага сэрвісу. Рэалізаваны спрошчаны парадак мытнага афармлення грузаў, якія перавозяцца чыгуначным транспартам, сказаў пасол.
Дзелавая праграма круглага стала ўключыла выступленні спецыялістаў БЧ па асноўных напрамках развіцця перавозак у 2017 годзе, а таксама прадстаўнікоў кампаній-грузаўладальнікаў. Яго ўдзельнікаў пазнаёмілі з тэхнічнымі, тэхналагічнымі і лагістычнымі магчымасцямі БЧ на рынку транспартных паслуг, стратэгіяй у частцы правядзення тарыфнай палітыкі і прыцягнення транзіту.
У мерапрыемстве прынялі ўдзел кіраўнікі рознага ўзроўню арганізацый Беларускай чыгункі, прадстаўнікі расейскіх грузаадпраўшчыкаў і грузаатрымальнікаў, экспедытараў, кампаній-аператараў рухомага саставу.
