Курс даляра працягвае расці (абноўлена)

Курс еўра знізіўся на 70 рублёў (на 0,39%) і склаў 17.736 рублёў.

Курс расейскага рубля знізіўся на 1,42 рубля (0,58%) да 244,7 беларускага рубля.

“І гэта яшчэ не самае дно”, – мяркуе эканаміст Леў Марголін:

– Мы яшчэ ў пачатку года казалі, што напрыканцы года курс павінен дасягнуць па некаторых думках васямнаццаці тысяч за адзін даляр, па некаторых дваццаці. Я думаю, што гэта павінна здзейсніцца. Калі ўлады і Нацыянальны банк ідуць на паступовае зніжэнне курса, то тут вельмі цяжка вызначыць – гэта ўжо рэальны курс ці ён будзе яшчэ надалей зніжацца. Нягледзячы на прэзідэнцкія выбары ўтрымаць яго не ўдаецца, трэба думаць, што ён будзе зніжацца яшчэ больш.

Паводле прагнозаў старшага аналітыка форэкс-брокера „Альпары” Вадзіма Іосуба, актыўны рост курсу даляра і еўра да беларускага рубля працягнецца, але краху не будзе. „Гэта звязана, у першую чаргу, з падзеннем расейскага рубля да долара і еўра. Структура нашага валютнага кошыка практычна аўтаматычна прыводзіць да таго, што долар і еўра растуць да беларускага рубля”, — адзначыў эксперт.

„Можна прагназаваць накладанне адразу двух фактараў: працяг росту кошту валютнага кошыка і зніжэнне беларускага рубля, — лічыць Іосуб. —  На гэта будзе накладвацца рост курсу долара і еўра да расейскага рубля. У выніку ў Беларусі і даляр, і еўра будуць актыўна расці, а курс расейскага рубля да беларускага — зніжацца. Такім чынам, рост кошту валютнага кошыка будзе ў цэлым дастаткова ўмераным”.

Аналітык не раздзяляе меркаванне пра тое, што пасля прэзідэнцкіх выбараў курс беларускага рубля рухне. „Хутчэй за ўсё, гэтага не адбудзецца, таму што нейкіх працэсаў штучнага стрымлівання беларускага рубля да выбарах я не заўважаў”, — сказаў Іосуб.

Паводле яго слоў, „чыста тэарэтычна абвал беларускага рубля можа здарыцца ў выпадку значнага перавышэння попыту над прапановай”. „Для гэтага на рынку павінна быць вельмі шмат рублёў у насельніцтва і ў прадпрыемстваў, якія яны хацелі б памяняць на даляры, — растлумачыў эксперт. — Але мы бачым, што Нацыянальны банк і ўрад праводзяць дастаткова акуратную палітыку адносна даходаў. Нейкага выбуховага росту зарплат перад выбарамі пакуль няма і, хутчэй за ўсё, не плануецца. Зарплаты ў намінальным выражэнні дастаткова павольна растуць, а ў рэальным, з улікам інфляцыі, нават зніжаюцца. Нацбанк стрымлівае рост грашовай масы, і „рублёвага навесу”, які мог бы выліцца на валютны рынак, ні ў насельніцтва, ні ў прадпрыемстваў няма. Гэта тая прычына, якая, як я лічу, не апраўдвае чаканне нейкага краху”.

Пра адсутнасць падстаў для рэзкіх ваганняў курсу беларускага рубля заяўляў на прэс-канферэнцыі 4 жніўня старшыня праўлення Нацбанка Павел Калаур. „Я не разумею, чаму часта праводзяць нейкі водападзел: перад выбарамі і пасля іх. Мы разглядаем сітуацыю да канца года. У нас курс плавае, ён закліканы адэкватна рэагаваць на выклікі. Зразумела, што шмат у чым гэты курс залежыць ад знешняга асяроддзя — цэн на нафту, курсаў нашых суседзяў, попыту і прапановы на ўнутраным рынку”, — сказаў ён.

„Безумоўна, мы арыентуемся на пэўныя прагнозы экспертаў па курсе расейскага рубля. І нашы ацэнкі дзесьці супадаюць з ацэнкамі вядучых расейскіх экспертаў, што найбліжэйшым часам ваганне расейскага рубля будзе ў межах 55-65 рублёў за даляр. Гэта ўсё тое, што ўпісвалася ў нашы сцэнарыі, якія прапрацоўваліся ў пачатку года. Гэта значыць нічога нечаканага ў нас або на рынку нашых суседзяў, што магло б справакаваць рэзкія значныя адхіленні курсу, нічога такога не адбываецца”, — падкрэсліў Калаур.

Ён запэўніў, што і ў далейшым курсаўтварэнне ў Беларусі будзе свабодным, а дынаміка курсу будзе рэагаваць на знешнія выклікі. „Але мы не чакаем нейкіх значных фактараў, якія аказалі б істотны ўплыў на змену курсу”, — дадаў кіраўнік Нацбанка.