Леў Марголін: Хочуць хоць кроплі назбіраць
Эканаміст Леў Марголін тлумачыць, чаму беларускія ўлады кінуліся ствараць нафтавыя запасы.
Днямі беларускі кіраўнік заявіў, што на непрадбачаныя выпадкі неабходна ствараць сур’ёзны запас нафты і паліва, бо зараз кошт нафты вельмі нізкі.
Леў Марголін: Гэта мне нагадвае жаданне гаспадара паставіць бочку пад дах, з якога капае вада пасля дажджу. Трэба разумець, што Беларусь выкарыстоўвае 24 мільёны тон нафты ў год. І дзе можна назбіраць такіх ёмістасцяў, каб назапасіць нафту альбо нафтапрадукты?
Можна зрабіць запасы на два тыдні альбо на месяц-два, але не больш.
РР: Але чаму б і не скарыстацца магчымасцю набыць нафту ў час, калі яна моцна патаннела?
Леў Марголін: Нічога дрэннага ў гэтым няма. Калі чалавек прыйшоў у магазін і ўбачыў, што нейкі тавар патаннеў у тры разы, бо выстаўлены на акцыю, то можна набыць і дзве адзінкі такога тавара. Пакладзем на паліцу і будзем думаць, што ў будучыні можа спатрэбіцца.
Але гэта не вырашэнне праблемы ў цэлым. Купіць танную нафту – натуральнае жаданне, але, па вялікім рахунку, яно вялікага надвор’я для беларускай эканомікі не зробіць.
Будаваць пад запасы нафты нейкія рэзервуары – гэта таксама той выпадак, калі мэта не апраўдвае сродкі. Гэта ж не газ, які можна захоўваць у ёмістасцях натуральнага паходжання.
Акрамя таго, зусім магчыма, прайшоў час, калі нафта каштавала дорага. Не выключана, што яе кошт і застанецца ў межах 30 даляраў за тону.
Кастусь Заблоцкі, Беларускае Радыё Рацыя
