Літва абяцае беларусам гуманітарную дапамогу, стыпендыі, запросіць ІТ-кампаніі
У сераду ўрад Літвы прыняў план падтрымкі народу Беларусі, які ўключае падтрымку беларусаў, што пацярпелі ад рэпрэсій за пратэсты супраць рэжыму.
Літва таксама абяцае выдзеліць стыпендыі для беларускіх студэнтаў, запрасіць кампаніі па інфармацыйных тэхналогіях (ІТ) і спецыялістаў у гэтым сектары, а таксама палегчыць выдачу віз грамадзянам Беларусі, паведамляе агенцтва BNS.
Міністр замежных спраў Лінас Лінкявічус, які прадставіў гэты план на пасяджэнні ўраду ў сераду, заявіў, што з урадавага рэзерву плануецца выдзеліць Міністэрству аховы здароўя да 100 тысяч. для гуманітарнай дапамогі.
«Хутчэй за ўсё, гэта будзе лячэнне», — сказаў міністр.
Урад дамовіўся, што на працягу тыдня кожны міністр ацэніць магчымасці фінансавання ў сваёй галіне, каб унесці свой уклад у розныя часткі плану і паінфармуе Міністэрства замежных спраў, а таксама ацэніць патрэбы ў фінансаванні на наступны год.
Стыпендыі
Таксама прапануецца выдзеліць сто дзяржаўных стыпендый для студэнтаў з Беларусі для навучання ў вышэйшых навучальных установах Літвы з асігнаванняў, выдзеленых Міністэрству адукацыі, навукі і спорту.
«Калі б была такая дамоўленасць, мы б прапанавалі назваць іх стыпендыі Каліноўскага. Міністэрства таксама падрыхтуе працэдуру, як гэта будзе рэалізавана на практыцы», — сказаў Лінкявічус.
ЭГУ
Сёлета плануецца і асобная падтрымка Беларускага Еўрапейскага гуманітарнага ўніверсытэту ў Вільні.
«Я магу сказаць, што мы сапраўды плануем вылучыць на гэта 200 тысяч еўра», — сказаў Лінкявічус.
У будучыні плануецца стварыць фонд для адміністравання і размеркавання гэтай падтрымкі, сказаў Лінкявічус.
Ён пацвердзіў, што шукаюцца магчымасці спрасціць выдачу віз грамадзянам Беларусі па запрашэнні юрыдычных асоб.
Палегчыць умовы для адкрыцця бізнесу
Міністр эканомікі і інавацыяў Рымантас Сінкявічус кажа, што міністэрства атрымала заяўкі ад 21 прадпрыемства ў галіне інфармацыйных тэхналогій (ІТ) з Беларусі на працу ў Літве. Паводле яго, яны сутыкаюцца з цяжкасцямі пры рэгістрацыі: банкі не згодныя адкрываць рахункі для гэтых кампаній у адпаведнасці з Законам аб прадухіленьні адмывання грашовых сродкаў.
«Калі вы не можаце адкрыць банкаўскі рахунак, вы не можаце зарэгістраваць кампанію, калі вы не можаце зарэгістраваць кампанію, вы не можаце запрашаць супрацоўнікаў, бо няма працадаўцы. Такое замкнёнае кола, і я думаю, што было б добра ўключыць у гэтае рашэнне, якое мы збіраемся прыняць, загад падрыхтаваць папраўкі да закону, якія дазваляюць замежным юрыдычным асобам адкрываць рахунак у літоўскіх банках», — сказаў ён.
Міністр унутраных спраў Рыта Тамашунене заяўляе, што актыўна шукаюцца рашэнні, якія спрашчаюць прыезд беларусаў у Літву, і па гэтым пытанні таксама праводзяцца кансультацыі з Банкам Літвы.
«Сумесна з Дэпартаментам па міграцыі мы ўжо прапануем рашэнні па палягчэнні выдачы нацыянальных віз», — кажа Тамашунене.
С. Сквярняліс: План яшчэ будзе даведзены да ладу
Прэм’ер-міністр Саўлюс Сквярняліс заявіў на прэс-канферэнцыі, што на пасяджэнні ў сераду Кабінет міністраў афіцыйна ўхваліў гэты план, але ён «яшчэ будзе адшліфаваны».
«Цяжка сказаць агульную суму, але прынятыя рашэнні аб фінансавай падтрымцы ўніверсітэту ЭГУ, стыпендыях і прававой рэабілітацыі людзей, якія пацярпелі ад рэпрэсій, аказанні юрыдычнай дапамогі. Прынятыя рашэнні аб пошуку шляхоў для тых беларускіх высокатэхналагічных кампаній, якія вырашылі пакінуць Беларусь, каб стварыць для іх умовы ў Літве», — сказаў Сквярняліс.
