Лукашэнка: Настаўнікам трэба падняць зарплату
Заработную плату школьным настаўнікам у Беларусі неабходна павысіць на чвэрць, заявіў Аляксандр Лукашэнка 1 верасня падчас наведвання спецыяльнай агульнаадукацыйнай школы-інтэрната № 13 Менска для дзяцей з парушэннем слыху.
„Хоць бы на чвэрць трэба за нейкі час падняць зарплату настаўнікам, і я ўпэўнены: са школы ніхто не сыдзе, нават той, які не па прызванні туды прыйшоў. Ва ўрадзе, як дамаўляліся, ужо зрабілі крок, таму давайце паспрабуем на працягу кароткага часу падняць зарплату настаўнікам. Але першая мая ўмова: сістэму адукацыі трэба цалкам аптымізаваць, пачынаючы ад Міністэрства адукацыі і заканчваючы школай, але не на шкоду дзецям”, — цытуе Лукашэнку дзяржаўнае агенцтва БелТА.
Пры гэтым кіраўнік дзяржавы заявіў, што не лічыць прафесію выкладчыка непрэстыжнай або нецікавай. „Выкладчык — гэта вяршыня, самая цікавая праца. Што тычыцца школы, усё-такі настаўнік мае больш свабоды. На вытворчасці трэба адпрацаваць цэлы дзень, а ў школе, нават калі чатыры-пяць гадзін выкладаеш, то ты ўсё роўна (так, заняты сшыткамі , падрыхтоўкай) больш вольны для творчасці або самарэалізацыі”, — лічыць Лукашэнка.
Нагадаем, 9 жніўня, заслухоўваючы даклад аб ходзе прыёмнай кампаніі і падрыхтоўцы сістэмы адукацыі да новага навучальнага года, кіраўнік дзяржавы заявіў, што „сітуацыя з матэрыяльным забеспячэннем настаўніцтва далей недапушчальная”. „На настаўніку заўсёды ляжала цяжкая місія, і ніколі багатымі настаўнікі не былі. Не зусім багатыя яны і сёння, — адзначыў Лукашэнка. — Але нагрузку на іх, у тым ліку палітычную, мы накладваем велізарную. Вазьміце парламенцкія выбары, нядаўнія прэзідэнцкія выбары: хто складаў аснову палітычнага ядра, якое праводзіла галоўную палітычную кампанію? Настаўнікі, урачы, дзяржаўныя служачыя. І сёння гэтыя катэгорыі грамадзян, якія забяспечваюць стабільнасць у нашай дзяржаве, неабгрунтавана, напэўна, пакрыўджаныя. Але перш за ўсё настаўнік „.
31 жніўня Савет міністраў зацвердзіў надбаўкі педагогам са стажам за аказанне дадатковых адукацыйных паслуг. Раней надбаўкі былі вызначаны педработнікам за наяўнасць кваліфікацыйных катэгорый і вар’іраваліся ад 30 да 120% тарыфнага акладу работніка.
Паводле звестак Белстата, за ліпень намінальная налічаная сярэдняя зарплата ў адукацыі склала 510 дэнамінаваных рублёў пры сярэднім значэнні па краіне 745,8 рубля.
