МАЗ спыніўся больш чым на 2 тыдні (абноўлена)
Менскі аўтазавод ня будзе працаваць з 25 снежня да 11 студзеня. Пра гэта піша praca-by.info.
Як кажуць рабочыя, у асобныя дні на працу выйдзе абмежаваная колькасць супрацоўнікаў. Іх навагодні адпачынак не аплачваецца. Адзінае што – выплацілі па 500 тысячаў рублёў за эканомію паліўна-энэргетычных рэсурсаў.
Паводле эканамічнага аглядальніка Міхася Залескага прастоі на беларускіх прадпрыемствах непасрэдна звязаныя з палітыкай Еўразійскага саюза, у які ўваходзіць і Беларусь:
— Паводле звестак, якімі я карыстаюся, а я гляджу індэкс RTSI на агенцтве Bloomberg, і бачу, што ўжо 6 гадоў расейскі фондавы індэкс зніжаецца пад адным і тым самым вуглом да гарызонту. І вось гэтае зніжэнне расейскай эканомікі, якое забірае палову нашага экспарту і дае нам значную частку імпарту, то бок усе паліўныя рэсурсы, яно і зніжае нашу эканоміку. Нізкі ўзровень дыверсіфікацыі знешняга гандлю.
Спыняюцца на вакацыі і іншыя буйныя прадпрыемствы, што ўваходзяць у холдынг “Белаўтамаз”.
Баранавіцкі аўтаагрэгатны завод ня будзе працаваць таксама з 25 снежня да 11 студзеня, такі ж завод у Асіповічах – з 30 снежня да 11 студзеня.
Беларускае Радыё Рацыя
Глядзіце таксама
