Міхаіл Чыгір: Патрэбен гаспадар-прыватнік
Былы прэм’ер-міністр Беларусі Міхаіл Чыгір разважае адносна таго, ці павысяць рэпрэсіі ў дачыненні да кіраўнікоў гаспадарак за эканамічныя паказчыкі.
Днямі міністр сельскай гаспадаркі і харчавання распавёў, што Лукашэнка распарадзіўся знайсці і пакараць вінаватых у несвоечасовай ўборцы лёну ў Гомельскай вобласці.
Міхаіл Чыгір: Ніхто не апраўдвае тых, хто своечасова не ўбраў лён, але, наколькі вядома, і надвор’е гэтаму не асабліва спрыяла. Іншая справа, што праблема ж не ў гэтым. На зямлі павінен быць гаспадар-прыватнік, якія будзе клапаціцца і пра сваю бульбу, і пра лён. Я яшчэ ў тыя часы, калі быў прэм’ерам, прапаноўваў пачаць прыватызацыю зямлі. І скажу, што з кожным годам будзе ўсё складаней, бо сельскае насельніцтва катастрафічна скарачаецца. Усе ведаюць, што заробкі ў вёсках зусім невялікія, а таму ўсе раз’язджаюцца па гарадах. Таму праблемы ў сельскай гаспадарцы будуць толькі нарастаць.
РР: Прыватнік змог бы выратаваць сітуацыю?
Міхаіл Чыгір: Безумоўна, бо ён лічыць кожную капейку. Калі з уборкай была крытычная сітуацыя, то ён бы і заробкі падняў работнікам, і знайшоў бы працоўную сілу. А кіраўнік гаспадаркі дзе возьме на гэта грошы? Многія самі без штаноў ходзяць. Ды і павялічыць заробкі асабліва нельга – затым за гэта спытаюць.
РР: А ці ўплываюць рэпрэсіі ў дачыненні да кіраўнікоў гаспадарак на эканамічныя паказчыкі?
Міхаіл Чыгір: Ніякім чынам. Увогуле, гэта не тое, што патрэбна для вырашэння праблемы. Па вялікаму рахунку, гэтымі пытаннямі не павінен займацца прзідэнт. Але ў краіне створана такая сістэма, што ён якраз гэтым і займаецца.
Кастусь Заблоцкі, Беларускае Радыё Рацыя
