Мінэнерга Расеі рыхтуе Беларусі „план Пуціна”
Мінэнерга Расеі найбліжэйшым часам распрацуе прапанову пра абавязковым выкарыстанні беларускімі вытворцамі нафтапрадуктаў расейскай транспартнай інфраструктуры пры перавалцы грузаў, паведаміў журналістам міністр энергетыкі РФ Аляксандр Новак.
„Мы такое даручэнне атрымалі і цяпер пачалі прапрацоўваць дэталі”, — цытуе Новака ТАСС. Паводле яго слоў, Мінэнерга „збярэ аналітыку найбліжэйшым часам і зможа прапанаваць варыянт”.
Кіраўнік Мінэнерга таксама адзначыў, што ў Расеі ёсць магчымасць паставіць у Беларусь менш за заяўленыя 24 млн тон нафты ў 2017 годзе ў межах заключаных дамоўленасцяў.
„Там ёсць пэўныя ў рамках падпісаных (пагадненняў) магчымасці пастаўляць у меншым аб’ёме, але пры гэтым магчымая доля да рэалізацыі нашымі беларускімі партнёрамі ў агульным аб’ёме будзе не большай за 24 млн тон”, — сказаў Новак у адказ на пытанне, ці ёсць у Расеі магчымасць паставіць менш за заяўлены аб’ём нафты і ці трэба Расеі гэты недахоп неяк кампенсаваць.
Як паведамлялася, прэзідэнт Расеі Уладзімір Пуцін заявіў пра неабходнасць звязаць пастаўкі нафты на беларускія НПЗ з транспартаваннем выпрацаваных нафтапрадуктаў цераз Расею. „Гэта трэба абмяркоўваць ў больш шырокім фармаце. Бо на беларускіх НПЗ перапрацоўваецца наша нафта, іншай там няма і наўрад ці з`явіцца, таму гэта трэба запакетаваць — атрыманне нашай нафты ад адпаведных пытанняў выкарыстання нашай інфраструктуры”, — заявіў Пуцін 16 жніўня ў Калініградскай вобласці на нарадзе па развіцці транспартнай інфраструктуры Паўночнага Захаду РФ.
Кіраўнік Расейскіх чыгунак Алег Белазёраў паскардзіўся прэзідэнту Расеі, што беларусы адмаўляюцца ад паслуг расейскіх чыгунак на карысць прыбалтыйскай інфраструктуры, матывуючы гэта доўгатэрміновымі кантрактамі.
Днём пазней прэм’ер-міністр Літвы Саўлюс Сквярняліс у інтэрв’ю радыёстанцыі Ziniu radijas заявіў, што ў выпадку калі Расея прымусіць Беларусь экспартаваць нафтапрадукты цераз яе жалезныя дарогі і парты, гэта можа быць эканамічна нявыгадна і небяспечна для Менска.
„Напрамак грузаў па чыгунках Расеі цераз парты Расеі для Беларусі можа быць і нявыгадна эканамічна, і небяспечна стратэгічна, калі мець на ўвазе, што гэтыя [расійскія] парты замярзаюць і кліматычныя ўмовы там зусім іншыя. Гэта асабліва адчувальна, калі гаворка ідзе аб перавозцы нафтапрадуктаў”, — сказаў кіраўнік літоўскага ўрада.
3 красавіка прэзідэнты Беларусі і Расеі паводле вынікаў сустрэчы ў Санкт-Пецярбургу паведамілі пра рашэнне нафтагазавых праблем. Згодна з падпісанымі 13 красавіка міжурадавымі дакументамі, Расея павінна аднавіць пастаўкі нафты ў аб’ёме 24 млн тон штогод з 2017 па 2024 гады.
