Нацбанк ініцыюе перайменаванне беларускіх форэкс-кампаній у інвестыцыйныя
Нацыянальны банк рыхтуе змены ў заканадаўства і прапаноўвае перайменаваць форэкс-кампаніі ў інвестыцыйныя кампаніі, паведаміў начальнік галоўнага ўпраўлення рэгулявання некрэдытных фінансавых арганізацый і інвестыцыйных аперацый Нацбанка Дзмітрый Набздораў, выступаючы 30 сакавіка на анлайн-канферэнцыі.
„Мы бачылі, што рынак, на якім працуюць беларускія форэкс-кампаніі, у папярэднія гады падвойваўся і 2020 год не стаў выключэннем. Калі ў 2019 годзе было зроблена каля 4 млн аперацый, то ў 2020-м — каля 8 млн аперацый. Доля аперацый са станоўчым вынікам захоўваецца на сярэднееўрапейскім узроўні — больш за 60%”, — адзначыў Набздораў.
У грашовым выражэнні рынак, на якім аперуюць форэкс-брокеры, вырас, паводле дадзеных Нацбанка, у 2020 годзе ў тры разы. Паводле слоў Набздорава, калі ў 2019 годзе кліенты беларускіх кампаній (82% з якіх нерэзідэнты) зрабілі аперацый (з улікам крэдытнага пляча) на 46,2 млрд долараў, то ў 2020 годзе — на 139,2 млрд долараў.
Пры гэтым прадстаўнік Нацбанка звярнуў увагу на змены структуры базавых актываў, з якімі працуюць кліенты беларускіх форэкс-кампаній.
„Калі ў 2017 годзе валютныя пары як базавыя актывы займалі 84% аперацый форэкс-кампаній, то ў 2020 годзе — 35%, а ў суме аперацый — 18%. Мы назіраем цікавасць кліентаў форэкс-кампаній да іншых базавых актываў — каштоўных металаў, каштоўных папер, нафты”, — канстатаваў Набздораў.
Паколькі фокус увагі кліентаў беларускіх форэкс-кампаній мяняецца, Нацбанк прапаноўвае перайменаваць форэкс-кампаніі ў інвестыцыйныя кампаніі.
Акрамя гэтага, адзначыў Набздораў, рэгулятар прапаноўвае пашырыць пералік базавых актываў, з якімі могуць працаваць беларускія форэкс-кампаніі. „Прапанова Нацыянальнага банка ў 2021 годзе заключаецца ў тым, каб пашырыць пералік базавых актываў і каб кліент-нерэзідэнт мог, знаходзячыся ў любой развітой юрысдыкцыі (у ЗША, Канадзе, Вялікабрытаніі), выходзіць на беларускі рынак і бачыць знаёмы для сябе пералік базавых актываў”, — растлумачыў Набздораў.
Для гэтага, паводле яго слоў, Нацбанк прапаноўвае пашырыць пералік базавых актываў „да лепшых сусветных перадавых практык”, якія даступныя кліентам інвестыцыйных кампаній (зарэгістраваных у ЗША, Японіі, Вялікабрытаніі, Канадзе, Аўстраліі).
Набздораў падкрэсліў, што рэгулятар будзе настойваць на перайменаванні беларускіх форэкс-кампаній у інвестыцыйныя і да лета адпаведны праект дзяржаўнага рашэння будзе ўнесены на разгляд у дзяржаўныя органы.
„Мы будзем настойваць на нашай прапанове, таму што называць кампаніі па-старому будзе зусім не актуальна ў 2021-м і зусім-зусім не актуальна ў наступныя гады”, — сказаў прадстаўнік Нацбанка.
Ён выказаў меркаванне, што калі прапановы рэгулятара будуць прынятыя іншымі дзяржорганамі і пералік базавых актываў, з якімі змогуць працаваць інвестыцыйныя кампаніі, пашыраць, то аб’ём і колькасць аперацый кліентаў можа вырасці ў 2021 годзе ў два разы ў параўнанні з мінулым годам.
