Нацбанк прагназуе скарачэнне ЗВР Беларусі
Нацыянальны банк прагназуе скарачэнне аб’ёму золатавалютных рэзерваў (ЗВР) Беларусі ў 2020 годзе з улікам рызык падатковага манеўру і знешніх абавязацельстваў. Пра гэта гаворыцца ў апублікаваным дакладзе намесніка старшыні праўлення Нацбанка Сяргея Калечыца на пашыраным пасяджэнні праўлення рэгулятара.
„На 1 студзеня 2021 года міжнародныя рэзервовыя актывы павінны скласці не менш як 7,3 млрд долараў ЗША. Гэты аб’ём ўлічвае неабходнасць пагашэння урадам і Нацыянальным банкам каля 4,3 млрд долараў ЗША знешніх і ўнутраных абавязацельстваў, а таксама рызыкі, звязаныя з падатковым манеўрам ў Расійскай Федэрацыі”, — канстатаваў Калечыц.
Намеснік кіраўніка Нацбанка адзначыў, што на 1 студзеня 2020 года аб’ём міжнародных рэзервовых актываў склаў 9,4 млрд долараў ЗША, што эквівалентна 2,7 месяца імпарту. За год ЗВР выраслі на 2,2 млрд долараў. Пры гэтым урад і Нацыянальны банк пагасілі знешніх і ўнутраных абавязацельстваў у замежнай валюце на суму 4,2 млрд долараў ЗША.
Як паведаміў Калечыц, акрамя куплі Нацыянальным банкам замежнай валюты на валютным рынку крыніцамі папаўнення золатавалютных рэзерваў з’яўляліся паступленні ў бюджэт падаткаў, пошлін і іншых плацяжоў у замежнай валюце, эмісія Міністэрствам фінансаў і Нацбанкам на ўнутраным рынку аблігацый, намінаваных у замежнай валюце, а таксама прыцягненне Мінфінам знешніх дзяржаўных пазык.
У 2019 годзе рэалізацыя курсавой палітыкі ажыццяўлялася ў рэжыме плаваючага абменнага курсу. Дынаміка курсу беларускага рубля пераважна фарміравалася пад уздзеяннем рынкавых сіл.
Разам з тым, працягнуў Калечыц, у справаздачным годзе чыстая прапанова замежнай валюты павялічылася ў дачыненні да 2018 года ў два разы, склаўшы 2,3 млрд долараў ЗША. Пры гэтым перавышэнне продажу валюты над купляй сфарміравалася на ўсіх сегментах валютнага рынку.
„У гэтых умовах Нацыянальны банк актыўна скупляў залішнюю прапанову замежнай валюты для папаўнення рэзервовых актываў, адначасова прадухіляючы істотную пераацэненасць беларускага рубля”, — падкрэсліў намеснік старшыні праўлення.
Паводле слоў Калечыца, у 2020 годзе захаваецца рэжым плаваючага валютнага курсу. Працягне змяншацца прысутнасць Нацбанка на валютным рынку ў мэтах згладжвання рэзкіх ваганняў курсу беларускага рубля. Пры перавышэнні прапановы замежнай валюты над попытам па-ранейшаму будуць ажыццяўляцца аперацыі па яе куплі для папаўнення золатавалютных рэзерваў.
Фота belmarket.by
Глядзіце таксама
