Нацбанк рэкамендаваў банкам абмежаваць памер дывідэндаў
Нацыянальны банк накіраваў камерцыйным банкам ліст з рэкамендацыямі наконт размеркавання заробленага прыбытку. Напярэдадні агульных сходаў акцыянераў, якія пройдуць у банках у найбліжэйшыя тыдні, Нацбанк рэкамендаваў абмежаваць памер дывідэндаў, што выплачваюцца паводле вынікаў працы крэдытных арганізацый за 2017 год.
У лісце гаворыцца, што „з мэтай забеспячэння банкамі ўстойлівага функцыянавання, пакрыцця наяўных рызык” і выканання прудэнцыйных патрабаванняў неабходна прыняць меры па павелічэнні капіталу за кошт прыярытэтнага накіравання „прыбытку за 2017 год і неразмеркаванага прыбытку мінулых гадоў”, а таксама шляхам „скарачэння выплат дывідэндаў”.
Як паведамляе цэнтральны банк, ён прааналізаваў памер і дастатковасць капіталу камерцыйных банкаў. У „шэрагу банкаў” выяўленае „нязначнае перавышэнне названых паказчыкаў над мінімальнымі ўсталяванымі значэннямі, а таксама адзначанае павелічэнне рызык, што прымаюцца на сябе”.
У сувязі з гэтым рэгулятар рэкамендаваў акцыянерам банкаў прыбытак не адбіраць, а накіраваць на павелічэнне капіталу, які эканамісты называюць падушкай бяспекі крэдытных арганізацый.
„У банкаў досыць прыбытку, які яны могуць накіраваць на павелічэнне капіталу, а не проста праесці”, — растлумачыў БелаПАН мэту рэкамендацый рэгулятара эксперт у фінансавых колах, знаёмы з пазіцый Нацбанка.
У сваю чаргу прадстаўнікі камерцыйных банкаў лічаць, што ўмяшанне Нацбанка ў працэс размеркавання прыбытку з’яўляецца несвоечасовым.
„У 2015—2016 гадах банкаўская сістэма Беларусі, як і ўся эканоміка, перажывала складаныя часы. Замежныя акцыянеры банкаў чакалі паляпшэння сітуацыі, а калі яно нарэшце адбылося, ім прапануюць адмовіцца ад прыбытку. Як мінімум, гэта несвоечасовая рэкамендацыя”, — мяркуе прадстаўнік аднаго з банкаў.
„Павелічэнне капіталу — у цэлым слушнае імкненне Нацбанка, але пры гэтым адміністрацыйнае нарошчванне капіталу за кошт прымусу да яго папаўнення з прыбытку лічу не самым карэктным крокам. Банкам варта пакідаць выбар, якімі інструментамі нарошчваць капітал”, — мяркуе эксперт Беларускага эканамічнага даследча-образовательного цэнтра (BEROC) Дзмітрый Крук.
Падобнага меркавання прытрымліваюцца і іншыя аналітыкі фінансавага рынку.
„Пры безумоўным выкананні параметраў бяспечнага функцыянавання ў акцыянераў банкаў павінна быць права свабодна распараджацца прыбыткам. Адміністрацыйнае ўмяшанне ў гэты працэс можа прывесці да таго, што акцыянеры абмяжуюць рэсурсы, якія накіроўваюцца на развіццё сваіх банкаў на тэрыторыі нашай краіны”, — заявіў аналітык даследчай групы BusinessForecast.by Аляксандр Муха.
Фота: Белнавіны
Глядзіце таксама
