Паступленні ў бюджэт ад пошлін на нафтапрадукты знізяцца на траціну
У 2019 годзе даходы бюджэту Беларусі ад вывазных мытных пошлін на нафтапрадукты могуць знізіцца на траціну ў параўнанні з 2018 годам. Паводле звестак БелаПАН, такую ацэнку заклала Міністэрства фінансаў у бюджэт на гэты год.
Варта заўважыць, што вывазныя мытныя пошліны фармуюць амаль 60% падатковых даходаў бюджэту ад знешнеэканамічнай дзейнасці, якія цалкам залічваюцца ў рэспубліканскі бюджэт. Пры гэтым ўнёсак падатковых даходаў ад ЗЭД у сукупныя паступленні рэспубліканскага бюджэту складае прыблізна 20%.
Чакаецца, што у 2019 годзе ў сувязі з рэалізацыяй падатковага манеўру ў нафтавай галіне Расеі падатковыя даходы ад знешнеэканамічнай дзейнасці скароцяцца на 13,4% (у параўнанні з 2018-м) да 4,36 млрд рублёў.
Прычына адмоўнай дынамікі — змяншэнне вывазных мытных пошлін на нафту і нафтапрадукты, якія залічваюцца ў бюджэт.
Паводле ацэнак уладаў, паступленні ў бюджэт ад вывазных мытных пошлін на нафтапрадукты складуць у 2019 годзе 1,39 млрд рублёў (на 31,3% менш у параўнанні з чаканым узроўнем 2018 года). Акрамя гэтага, вывазныя мытныя пошліны на нафту, якую Беларусь на сваёй тэрыторыі здабывае і экспартуе, прынясуць у бюджэт у 2019 годзе 316,5 млн рублёў (на 22,1% менш у параўнанні з 2018-м).
Паводле інфармацыі БелаПАН, Мінфін падлічыў, што адмоўная дынаміка паступленняў па гэтых артыкулах звязаная ў асноўным з рэалізацыяй падатковага манеўру ў нафтавай галіне Расеі. Згодна з ацэнкай уладаў, страты бюджэту ад вывазных мытных пошлін на нафту і нафтапрадукты (з-за падатковага манеўру) складуць у 2019 годзе 513,1 млн рублёў.
Акрамя гэтага, для частковай кампенсацыі нафтаперапрацоўчым заводам росту цаны на нафту ва ўмовах рэалізацыі падатковага манеўру ў бюджэце на 2019 год зніжаныя на 25% акцызы на аўтамабільнае паліва. Страты даходнай часткі бюджэту з-за гэтага ацэньваюцца ў 170,7 млн рублёў.
Аляксандр Лукашэнка 10 студзеня на нарадзе па эканамічных пытаннях даручыў ураду „не гіпербалізаваць праблемы, звязаныя са стратамі беларускага бюджэту з-за падатковага манеўру ў Расеі, а шукаць іншыя надзейныя крыніцы, якія кампенсуюць гэтыя негатыўныя моманты”.
На думку экспертаў, у тым выпадку, калі Беларусі давядзецца шукаць унутраныя крыніцы для кампенсацыі страт у сувязі з падатковым манеўрам, можа паўстаць пытанне аб скарачэнні падатковых ільгот альбо павышэнні ставак падаткаў.
Акрамя гэтага, эксперты чакаюць, што з-за ўплыву падатковага манеўру можа быць скарочаная падтрымка дзяржпрадпрыемствам.
Як паведамлялася, сукупныя страты з-за падатковага манеўру ў нафтавай галіне Расіі беларускія ўлады ў 2019—2024 гадах ацэньваюць ў 10,5 млрд долараў.
