Пуцін хоча развярнуць беларускія нафтапрадукты на РФ
Прэзідэнт Расеі прапанаваў абавязаць беларускія нафтаперагонныя заводы выкарыстоўваць расейскую інфраструктуру для перавозкі нафтапрадуктаў. Такую ініцыятыву Уладзімір Пуцін агучыў на нарадзе па развіцці транспартнай інфраструктуры Паўночнага Захаду Расеі, паведаміў ТАСС.
«Гэта трэба абмяркоўваць у больш шырокім фармаце. Бо на беларускіх НПЗ перапрацоўваецца наша нафта, другой там няма і наўрад ці з’явіцца, таму гэта трэба запакетаваць — атрыманне нашай нафты ад адпаведных пытанняў выкарыстання нашай інфраструктуры», – заявіў Пуцін.
Кіраўнік Расейскай чыгункі Алег Белазёраў паскардзіўся прэзідэнту Расеі, што беларусы адмаўляюцца ад паслуг расейскай чыгункі на карысць прыбалтыйскай інфраструктуры. «Наконт нафтаналіву мы далі 50-працэнтную зніжку для перавозкі з беларускіх заводаў, але беларускія заводы пакуль не выкарыстоўваюць ні Усць-Лугу, ні Санкт-Пецярбург, а едуць у рэспублікі Прыбалтыкі. Мы вядзем дыскусію, яны кажуць, што ў іх доўгатэрміновыя кантракты на гэтую тэму заключаны, але мы стараемся выбудоўваць з імі дыялог», — сказаў Белазёраў.
Аб’ёмы закупкі расейскай нафты — адно з самых балючых пытанняў беларускай эканомікі, якое можа забяспечыць як яе рост, так і сур’ёзнае падзенне.
У прыватнасці, па дадзеных Даследчага цэнтра ІПМ, базавы прагноз на 2018 год (ён рэалізуецца пры пастаўцы з Расеі 23 млн тон нафты ў год) і альтэрнатыўны (18 млн тон). прадугледжваюць зусім розны прырост ВУП — 2,7% па базавым сцэнары і ўсяго 0,5% – па альтэрнатыўным.
У 2016 годзе Беларусь экспартавала 13 млн тон нафтапрадуктаў. Ужо даўно асноўны транзіт беларускіх нафтапрадуктаў ажыццяўляецца праз парты Літвы і Латвіі ў сілу геаграфічнай блізкасці. Расейскі бок мяркуе, што зніжэнне тарыфаў стымулюе перавод нафтавых грузаў з прыбалтыйскіх партоў у парты РФ. Улады Расеі прынялі рашэнне да 2018 года спыніць экспарт нафтапрадуктаў праз парты Клайпеды (Літва), Вентспілса і Рыгі (Латвія), загрузіўшы свае ўласныя магутнасці на Балтыйскім і Чорным моры (Усць-Луга, Прыморск і Новарасійск).
Але краіны Балтыі таксама не сядзяць склаўшы рукі. У прыватнасці, у пачатку гэтага года ў Менску было адкрыта пастаяннае прадстаўніцтва Латвійскай чыгункі, каб «спрыяць супрацоўніцтву ў галіне чыгуначных перавозак і ўмацаваць супрацоўніцтва ў сферы транзіту і лагістыкі». Кіраўніком прадстаўніцтва ЛЧ у Менску стала Уна Вітола, папярэдні прадстаўнік Міністэрства камунікацый Латвіі ў Расеі. У 2016 годзе па чыгунцы з Беларусі ў Латвію было перавезена 15,6 млн тон грузаў (у тым ліку 5,4 млн тон нафтапрадуктаў, што склала 79% усіх нафтаналіўных грузаў, перавезеных па латвійскіх рэйках).
