На Астравецкай АЭС падзенне заробкаў
Перспектывы выкарыстання атамнай энергіі ў Беларусі абмяркоўваюць у Астраўцы дэпутаты Палаты прадстаўнікоў на сваім выяздным пасяджэнні. Іх таксама азнаёмяць з хадой будаўніцтва беларускай атамнай электрастанцыі, якая паўстае ў Астравецкім раёне Гарадзеншчыны. Як і заўсёды, на падобныя мерапрыемствы не запрашаюцца прадстаўнікі грамадскасці. Актывісты, якія выступаюць супраць будаўніцтва АЭС, атрымліваюць інфармацыю ад самых рабочых, – кажа жыхар Астраўца Іван Крук:
– Справа ў тым, што раней атамшчыкі атрымлівалі па 10-12 мільёнаў заробку, а цяпер атрымліваюць па 3-4 мільёны, і людзі вельмі абураюцца. Некаторыя ўжо хочуць байкатаваць, падымаць шум і гэтык далей. Чыноўнік ж кажуць, што гэта расцэнкі іншыя сталі.
Як заўважае актывіст з Варнянаў Мікалай Уласевіч, сярод рабочых на будаўніцтве беларускай атамнай станцыі цяпер вельмі шмат украінцаў:
– Паводле маёй інфармацыі, там на сёння больш паловы рабочых – гэта ўкраінцы. І вось рабочыя некаторыя, беларусы, кажуць, што заробкі ўпалі менавіта таму, што ўкраінцы прыехалі і гатовыя працаваць за любыя грошы. Але я не згодны з такой ацэнкай сітуацыі. Найперш на гэта паўплывала тая эканамічная сітуацыя, якая склалася ў Расеі, а пазней у Беларусі, якая прывяла да таго, што працэс падзення заробкаў стаў відавочным.
У той жа час афіцыйна паведамляецца, што будаўніцтва беларускай АЭС ідзе паводле плану, ніякіх праблемаў няма, а першы энергаблок запусцяць ужо ў 2018 годзе. Адметна, што частку абсталявання для станцыі пастаўляюць украінскія прадпрыемствы, а крэдыт на будаўніцтва выдала Расея.
Яна Запольская, Беларускае Радыё Рацыя
Глядзіце таксама
