Расея абмежавала пастаўкі малочнай прадукцыі з Беларусі
Рассельгаснагляд з 19 траўня ўвёў часовыя абмежаванні на пастаўкі ў Расею прадукцыі шэрагу беларускіх вытворцаў сухога малака, сыру і масла, абвяшчае паведамленне на сайце ведамства.
У спіс прадпрыемстваў, якія трапілі пад абмежаванні, увайшлі, у прыватнасці, „Кобрынскі масларобна-сыраробны завод”, „Маладзечанскі малочнай камбінат”, „Малочная кампанія Наваградскія дары”, „Пружанскі малочны камбінат”, „Слуцкі сыраробны камбінат” і яго Любанскі філіял.
Падставай для такога рашэння стала тое, што ў прадукцыі гэтых вытворцаў паўторна выявілі лінкаміцын, натаміцын, цыпрафлаксацын, а таксама цілазін.
Раней стала вядома, што Рассельгаснагляд зрабіў больш жорсткімі кантроль дзевяці беларускіх прадпрыемстваў.
Масква ўжо абмяжоўвала пастаўкі жывёлагадоўчай прадукцыі беларускіх вытворцаў па розных падставах. У красавіку Рассельгаснагляд праінспектаваў 18 прадпрыемстваў на адпаведнасць патрабаванням ЕАЭС. У пачатку траўня ў міністэрстве сельскай гаспадаркі і харчавання Беларусі паведамілі, што падрыхтавалі адказы на заўвагі па выніках гэтай праверкі.
