Расея не будзе здымаць усіх абмежаванняў на беларускую малочку
Рассельгаснагляд не будзе здымаць усе абмежаванні на пастаўкі беларускай малочнай прадукцыі.
Такую заяву зрабіў кіраўнік ведамства Сяргей Данкверт па выніках перамоў з беларускай дэлегацыяй у Супонева, што ў Бранскай вобласці, перадае ТАСС. Сярод іншага Данкверт сказаў, што не бачыць магчымасць “шырока адкрываць і здымаць абмежаванні”. Таму бліжэйшым часам некалькім беларускім прадпрыемствам дазволяць пастаўкі, а некалькім — забароняць.
Таксама кіраўнік Рассельгаснагляду кажа, што з беларускім бокам застаецца “маса розначытанняў”. Напрыклад, Беларусь толькі ад 1 ліпеня перайшла на новую сістэму маніторынгу прадукцыі, якая адпавядае патрабаванням тэхрэгламента, але каб прымаць рашэнні на падставе дадзеных гэтага маніторынгу, трэба паглядзець, як ён будзе працаваць цягам месяца. Таксама данкверт сцвярджае, быццам Беларусь закрывае ад Расеі інфармацыю аб прадукцыі, якую пастаўляе, а ўсе дадзеныя з беларускіх лабараторыяў захоўваюцца не ў электронным, а ў папяровым выглядзе. Рассельгаснагляд таксама хоча надаць болей увагі беларускай статыстыцы вытворчасці, каб пазбегнуць рээкспарту з трэціх краінаў.
