Сусветны банк прагназуе рэцэсію ў Беларусі ў 2017 годзе
Сёлета рэцэсія ў Беларусі захаваецца. На нязначны рост беларуская эканоміка можа выйсці толькі ў 2018—2019 гадах. Такі прагноз утрымліваецца ў новым эканамічным аглядзе Сусветнага банка (СБ), прэзентацыя якога адбылася ў Менску 15 мая.
„Мы чакаем аднаўленне эканамічнага росту толькі ў 2018 годзе. Прастора для стымулявання ўнутранага попыту ў гэтым годзе, на наш погляд, усё яшчэ застаецца слабай, калі яна наогул існуе. З іншага боку, захоўваецца знешняя ўразлівасць беларускай эканомікі”, — заявіў на прэзентацыі краінавы эканаміст СБ Кірыл Гайдук.
Ён даў зразумець, што ў выпадку правядзення структурных рэформаў выхад краіны на ўстойлівы эканамічны рост магчымы. „Магчымасць забяспечыць устойлівы эканамічны рост захоўваецца за кошт павышэння прадукцыйнасці, больш эфектыўнага выкарыстання працы і капіталу, а таксама паляпшэння дзелавога клімату”, — падкрэсліў Гайдук.
Паводле ацэнак Сусветнага банка, рэальны ВУП у 2017 годзе знізіцца на 0,4%, пасля чаго адбудзецца ўмераны рост на 0,7% у 2018 годзе і 1,2% — у 2019 годзе.
Эканамісты СБ чакаюць, што аднаўленне росту ў апрацоўчай прамысловасці будзе адбывацца на фоне паступовага ажыўлення знешняга попыту. „Тым не менш унутраны попыт будзе заставацца абмежаваным, паколькі нізкія аб’ёмы інвестыцый прывядуць да недавыкарыстання магутнасцяў, а таксама нізкіх тэмпаў росту выпуску і даходаў. Для таго каб пазбегнуць пасткі нізкага росту, неабходны рост прадукцыйнасці”, — лічаць аўтары макраэканамічнага агляду.
Пры гэтым яны адзначаюць, што ў сярэднетэрміновай перспектыве захоўваюцца значныя негатыўныя рызыкі.
„Па-першае, прысутнічае рызыка неўпарадкаванай ліквідацыі дысбалансаў у фінансавым сектары ў тым выпадку, калі не будуць выпрацаваны механізмы вырашэння праблем неплацежаздольных дзяржаўных прадпрыемстваў і праблемных крэдытаў”, — лічаць эксперты СБ. Яны нагадваюць, што доля праблемных крэдытаў у банкаўскай сістэме Беларусі ўжо істотна вырасла.
Другую рызыку для беларускай эканомікі эксперты бачаць у высокай пазыковай нагрузцы. „У 2017 і 2018 гадах надыходзяць тэрміны пагашэння вялікіх аб’ёмаў знешняй запазычанасці, у сувязі з чым захоўваецца рызыка неўпарадкаванай карэкціроўкі дысбалансаў у знешнеэканамічным сектары”, — мяркуюць аўтары эканамічнага агляду.
Эксперты Сусветнага банка нагадваюць, што ў 2017 годзе беларускі ўрад выдзеліць 3,4 млрд. долараў (каля 7,5% прагназаванага ВУП) на мэты пагашэння знешняга дзяржаўнага доўгу і выплаты працэнтаў па ім.
„Здольнасць рэспублікі закрыць усе свае патрэбнасці ў фінансаванні, у тым ліку і для патрэб пагашэння еўрааблігацый на суму 800 млн. долараў ЗША ў студзені 2018 года, будзе залежаць ад таго, ці ўдасца прыцягнуць дадатковыя сродкі ў замежнай валюце на міжнародных рынках капіталу і (або ) пазычаць замежную валюту на ўнутраным рынку”, — гаворыцца ў аглядзе.
На думку экспертаў, для скарачэння знешняй уразлівасці эканомікі ўладам „крытычна важна” забяспечыць далейшае павышэнне эфектыўнасці ў бюджэтна-падатковай сферы, у тым ліку ліквідаваць фіскальныя і квазіфіскальныя рызыкі.
„Для гэтага спатрэбіцца істотна павысіць эфектыўнасць кіравання дзяржаўнымі прадпрыемствамі, рэфармаваць сістэму субсідавання энергарэсурсаў, праводзіць абачлівую палітыку заработнай платы, старанна аналізаваць усе планаваныя інвестыцыі і прымаць меры, якія накіраваныя на захаванне паступлення падатковых даходаў, але пры гэтым не перашкаджаюць развіццю гаспадарчых суб’ектаў, якое ў канчатковым выніку будзе садзейнічаць аднаўленню эканамічнага росту”, — лічаць эканамісты Сусветнага банка.
БелаПАН
