Тэхніка БелАЗ у студзені-лістападзе пастаўлялася ў 47 краін свету
Тэхніка БелАЗ у студзені – лістападзе бягучага года пастаўлялася ў 47 краін свету.
Найбольшую ўдзельную вагу ў знешнегандлёвым абароце (экспарт – імпарт) займаюць Расея (66,6 працэнта), Вялікабрытанія (11 працэнтаў), Украіна (5,3 працэнта), Узбекістан (4,2 працэнта), ЗША (2,3 працэнта). „Знешнегандлёвая дзейнасць мае яркую шматвектарную накіраванасць, пры гэтым геаграфія партнёрства пастаянна пашыраецца”, – адзначылі ў прэс-службе.
Лідзіруючае месца ў агульным аб’ёме адгрузкі займаюць 110-130-тонныя кар’ерныя самазвалы (27 працэнтаў) і 220-240-тоннікі (24 працэнты). Потым ідуць 45-тоннікі (13 працэнтаў). Самая прадаваемая мадэль – БелАЗ-75131, яе купілі 22 працэнты заказчыкаў.
Сярэдняя грузападымальнасць пастаўленых самазвалаў – 124 т (за аналагічны перыяд 2018 года – 119 т). У цэлым за мінулы год гэты паказчык складаў 120 т.
ААТ „БелАЗ” – кіруючая кампанія холдынга „БелАЗ-Холдынг” – буйнейшы сусветны вытворца кар’ерных самазвалаў і транспартнага абсталявання для горназдабыўной і будаўнічай прамысловасці. Займае каля 30 працэнтаў сусветнага рынку кар’ерных самазвалаў асабліва вялікай грузападымальнасці. Вырабляе самы вялікі ў свеце кар’ерны самазвал грузападымальнасцю 450 т. У гэтым годзе на прадпрыемстве завяршыліся два маштабныя інавацыйныя праекты па мадэрнізацыі, пашырана лінейка выпускаемай тэхнікі.
