Тэрмін крэдыту на БелАЭС прадоўжаны на 2 гады
Тэрмін крэдыту для будаўніцтва Беларускай АЭС прадоўжаны на два гады, стаўка зніжана да 3,3 працэнта гадавых. Гэта прадугледжана змяненнямі ў пагадненне аб прадастаўленні ўраду Беларусі крэдыту для будаўніцтва атамнай электрастанцыі, паведамляе БЕЛТА са спасылкай на сайт Міністэрства фінансаў Беларусі.
14 ліпеня ў Маскве падпісаны пратакол аб унясенні змяненняў у пагадненне паміж урадамі Беларусі і Расеі аб прадастаўленні дзяржаўнага экспартнага крэдыту для будаўніцтва БелАЭС ад 25 лістапада 2011 года.
„Пратаколам прадугледжана павелічэнне ў параўнанні з дзеючымі ўмовамі на два гады перыяду даступнасці крэдыту, ільготнага перыяду, і, адпаведна, тэрміну крэдыту. Гэта дасць магчымасць скарыстацца сродкамі крэдыту на будаўніцтва атамнай электрастанцыі аж да ўводу яе ў эксплуатацыю ў 2022 годзе”, – адзначылі ў Мінфіне.
Таксама зніжана працэнтная стаўка па крэдыце да 3,3 працэнта гадавых і зменены рэжым стаўкі – з плаваючай на фіксаваную. „Гэта дасць магчымасць палепшыць паказчыкі праекта будаўніцтва атамнай электрастанцыі, знізіць расходы беларускага боку па абслугоўванні знешняй дзяржаўнай пазыкі і захеджыраваць рызыку нявызначанасці ў сувязі з адмовай у сярэднетэрміновай перспектыве ўдзельнікамі глабальнага фінансавага рынку ад пераменнай стаўкі LIBOR”, – растлумачылі ў Мінфіне.
Фота eadaily.com
