Ці ўратуе ад санкцый казахстанская нафта?
Заходнія санкцыі яшчэ цалкам не запрацавалі, а нафтавая прамысловасць ужо пачала адчуваць немалыя цяжкасці, піша палітолаг Валер Карбалевіч. З’явілася паведамленне, што на трэці квартал расейскія кампаніі не плануюць пастаўляць нафту на НПЗ «Нафтан» у Наваполацку. Пра гэта паведаміў прадстаўнік кампаніі «Транснефть».
Раней, калі ўзнікалі праблемы з расейскімі кампаніямі, урад Беларусі знаходзіў выйсце з сітуацыі даволі проста. Куплялі нафту ў іншых краінах, прывозілі танкерамі ў Клайпеду ці Адэсу і перавозілі ў Беларусь чыгункаю ці перапраўлялі з поўдня нафтаправодам Адэса — Броды.
А цяпер так не атрымаецца. Літва падпарадкоўваецца рашэнню ЕЗ па санкцыях датычна нафтавай галіны. З Украінай пакуль не зразумела, аднак ёсць верагоднасць, што Кіеў можа далучыцца да санкцый. Таму лепш не рызыкаваць.
26 чэрвеня адбылася тэлефонная размова Аляксандра Лукашэнкі з прэзідэнтам Казахстану Касым-Жамартам Такаевым. А ўжо 27 чэрвеня туды накіравалася беларуская дэлегацыя на чале з прэм’ерам Раманам Галоўчанкам. І 28 чэрвеня ў Нур-Султане кіраўнікі ўрадаў Беларусі і Казахстану падпісалі пагадненне «Аб гандлёва-эканамічным супрацоўніцтве ў галіне паставак нафты і нафтапрадуктаў у Беларусь».
Пагадненне — гэта добра, але якім чынам казахстанская нафта можа быць дастаўлена ў Беларусь? Раней Расея не дазваляла выкарыстоўваць нафтаправоды, якія праходзяць па расейскай тэрыторыі. А як цяпер, пакуль невядома.
Другі варыянт — чыгункаю. Але гэта дорага, даволі вялікае транспартнае плячо. Наўрад ці пры выкарыстанні такой схемы можна атрымаць нейкі прыбытак. Хіба толькі загрузіць «Нафтан», каб не стаяў.
І гэта — толькі пачатак вялікай санкцыйнай гісторыі.
Глядзіце таксама
