У 19 новых краін пачалі пастаўляць беларускія прадукты харчавання
Геаграфія экспарту беларускай сельскагаспадарчай прадукцыі і прадуктаў харчавання ў студзені-лістападзе 2018 года пашырылася за кошт 19 новых краін. Аб гэтым паведамілі ў Міністэрстве сельскай гаспадаркі і харчавання.
„У студзені-лістападзе мінулага года сельскагаспадарчая прадукцыя і прадукты харчавання пастаўляліся ў 95 краін свету (у студзені-лістападзе 2017 года – у 86). У тым ліку малако і малакапрадукты экспартаваліся ў 58 краін, мяса і мясапрадукты – у 19 краін. Геаграфія экспарту папоўнілася 19 новымі краінамі”, – адзначылі ў Мінсельгасхарчы.
За 11 месяцаў мінулага года айчынныя арганізацыі экспартавалі сельгаспрадукцыі і прадуктаў харчавання на $4,8 млрд, што на 4,9 працэнта перавысіла аб’ёмы экспарту ў адпаведным перыядзе 2017 года. Прырост валютнай выручкі за названы перыяд склаўся ў аб’ёме $224 млн.
Доля экспарту сельскагаспадарчай прадукцыі і прадуктаў харчавання ў агульным аб’ёме экспарту таварамі Рэспублікі Беларусь склала 15,5 працэнта.
