У Беларусі 1,9% работнікаў арганізацый атрымліваюць заробак да 300 рублёў
У Беларусі 1,9% работнікаў арганізацый атрымліваюць зарплату да 300 рублёў, вынікае з дадзеных афіцыйнай статыстыкі па выніках мая 2020 года. Гэты паказчык публікуецца двойчы на год — за травень і лістапад.
Ад 300,1 да 400 рублёў атрымліваюць 4,2% работнікаў, ад 400,1 да 500 — 8,4%, ад 500,1 да 600 — 9,1%, ад 600,1 да 800 — 18,3%, ад 800,1 да 1.000 — 16,6%, ад 1.000,1 да 1.500 — 24,8%, ад 1.500,1 да 2.000 — 9%, ад 2.000,1 да 3.000 — 4,9%, ад 3.000,1 да 5.000 — 1,8%, ад 5.000,1 да 7.000 — 0,5%, ад 7.000,1 да 10.000 — 0,3%, звыш 10.000 — 0,2%.
Медыянны заробак за травень склаў 893,9 рубля. Для параўнання, сярэдні заробак — 1.227,9 рубля.
Максімальны медыянны заробак атрымліваюць IT-спецыялісты (3.501,1 рубля), мінімальны — творчыя работнікі (570,7 рубля).
Медыянная заработная плата — памер заработнай платы, які знаходзіцца ў цэнтры шэрагу размеркавання колькасці работнікаў па памерах налічанай заработнай платы і які дзеліць яго на дзве роўныя часткі — з заработнай платай ніжэйшай і вышэйшай за медыянную.
