У Беларусі ўводзіцца лічбавы рукапісны подпіс
У Беларусі ўводзіцца новы спосаб падпісання (пацвярджэння) дакумента ў электронным выглядзе — лічбавы рукапісны подпіс, а таксама пашыраецца пералік банкаўскіх аперацый, паслуг і пагадненняў, якія здзяйсняюцца з выкарыстаннем праграмна-апаратных сродкаў і тэхналогій, паведаміла прэс-служба Нацыянальнага банка.
Адпаведныя рашэнні змяшчаюцца ў пастанове праўлення ведамства ад 19 лютага № 65.
Лічбавы рукапісны подпіс можа прастаўляцца як аддалена з выкарыстаннем спецыяльных праграмна-апаратных сродкаў (у тым ліку планшэтаў і дысплеяў), так і пры асабістай прысутнасці кліента ў аддзяленні банка.
„Такі спосаб падпісання юрыдычна значных дакументаў будзе спрыяць развіццю фінансавых паслуг, якія аказваюцца банкамі з дапамогай лічбавых тэхналогій, а таксама скарачэнню папяровага дакументаабароту”, — пракаментавала прэс-служба.
Пастановай № 65 для фізічных асоб прадугледжваецца магчымасць набыцця каштоўных папер з выкарыстаннем праграмных сродкаў, а таксама заключэння з іх дапамогай дагавора залогу каштоўных папер пры забеспячэнні выканання абавязацельстваў па дагаворах, што заключаюцца банкамі. Гэтыя нормы дазволяць закласці аснову і актывізаваць дыстанцыйную працу ў галіне выкарыстання каштоўных папер, лічаць у Нацбанку.
Акрамя таго, у межах выканання дэкрэта прэзідэнта № 7 аб развіцці прадпрымальніцтва скасоўваецца норма, якая абавязвае банкі змацоўваць пячаткай копію дакумента ў электронным выглядзе на папяровым носьбіце. Пры гэтым пастановай № 65 банку даецца права прастаўляць пячатку на копіі дакумента ў электронным выглядзе.
Раней у краіне быў укаранёны электронны лічбавы подпіс — рэквізіт электроннага дакумента, якi атрымлiваецца дзякуючы крыптаграфічнай трансфармацыі інфармацыі з выкарыстаннем адмысловага ключа.
