У Беларусі зноў даражэе камуналка
Кошт жыллёва-камунальных паслуг з 1 студзеня 2017 года вырасце прыкладна на 10 рублёў, пры гэтым у далейшым на працягу года, хутчэй за ўсё, беларусаў чакае яшчэ адно падвышэнне тарыфаў, піша БелТА.
Пра гэта паведаміў падчас круглага стала першы намеснік міністра эканомікі Беларусі Аляксандр Забароўскі, кажучы пра ход перамоў з МВФ пра пачатак новай праграмы, якая, нагадаем, прадугледжвае выдзяленне крэдыту Беларусі ў памеры каля трох мільярдаў даляраў.
Паводле яго слоў, усе пытанні ў асноўным узгоднены, за выключэннем падвышэння тарыфаў на жыллёва-камунальныя паслугі.
«Датычна 2017 года мы гаворым пра тое, што з 1 студзеня, як і належыць у адпаведнасці з дзеючым заканадаўствам, адбудзецца падвышэнне кошту жыллёва-камунальных паслуг прыблізна на 10 рублёў», – сказаў Забароўскі.
Ён таксама нагадаў, што да канца 2017 года беларусы павінны будуць аплачваць 75% ад кошту жыллёва-камунальных паслуг, а да канца 2018 года – на 100%.
Фота tut.by
