У Токіа абмеркавалі патэнцыял парка „Вялікі камень”
Першы дзелавы семінар-форум з удзелам афіцыйных і дзелавых колаў Беларусі, Кітая і Японіі па развіцці індустрыяльнага парка „Вялікі камень” і эканамічнага патэнцыялу Беларусі адбыўся 28 траўня ў Токіа. Аб гэтым паведамілі ў пасольстве Беларусі ў Японіі.
У форуме прынялі ўдзел каля 70 бізнесменаў з трох краін, прадстаўнікі міністэрстваў эканомікі, гандлю і прамысловасці Японіі, Міністэрства камерцыі Кітая, пасольства Кітая ў Японіі. Ад Беларусі на мерапрыемстве прысутнічалі прадстаўнікі Міністэрства замежных спраў, кіраўніцтва Мінскай вобласці, адміністрацыі індустрыяльнага парка, БелАЗа.
Надзвычайны і Паўнамоцны Пасол Беларусі ў Кітайскай Народнай Рэспубліцы Кірыл Руды выступіў мадэратарам панэльнай дыскусіі па тэме „Паспяховы вопыт удзелу замежных кампаній у рэалізацыі праектаў на тэрыторыі Рэспублікі Беларусь”. Дыпламат запрасіў патэнцыяльных інвестараў наведаць нашу краіну 2 ліпеня, каб прыняць удзел у рэгіянальным міжнародным форуме, які пройдзе ў парку „Вялікі камень”.
Арганізатарамі мерапрыемства ў Токіа выступілі пасольствы Беларусі ў Японіі і ў Кітаі, СЗАТ „Кампанія па развіцці індустрыяльнага парка”, Японскі інстытут замежных інвестыцый (JOI).
