Улады плануюць адмяніць мэтавую куплю валюты
Беларускія ўлады плануюць у найбліжэйшы час прыняць рашэнне аб адмене мэтавай куплі замежнай валюты на ўнутраным рынку. Паводле інфармацыі БелаПАН, Нацбанк ужо падрыхтаваў праект адпаведнага рашэння.
З 1990-х у Беларусі дзейнічае мэтавая купля замежнай валюты. Прадпрыемствы і індывідуальныя прадпрымальнікі могуць купіць замежную валюту на ўнутраным рынку толькі на пэўныя мэты.
У прыватнасці, дазволена купляць валюту для выканання абавязацельстваў перад нерэзідэнтамі, але пры гэтым не дапускаецца набыццё замежнай валюты для яе размяшчэння ва ўклад. Купля замежнай валюты для разлікаў з рэзідэнтамі таксама абмежаваная. Купіць замежную валюту на ўнутраным рынку юрыдычныя асобы да гэтага часу могуць толькі для выплаты супрацоўнікам камандзіровачных расходаў, а таксама для разлікаў з банкам па пагашэнні крэдытаў.
Пасля адмены мэтавай куплі прадпрыемствы і індывідуальныя прадпрымальнікі змогуць купляць замежную валюту ў неабмежаваным аб’ёме і распараджацца ёй па сваім меркаванні.
Пры гэтым, як стала вядома БелаПАН, для маніторынгу сітуацыі на ўнутраным рынку ўлады плануюць збіраць статыстычную інфармацыю пра мэты набыцця валюты (юрыдычныя асобы павінны будуць указваць пры куплі валюты на ўнутраным рынку код мэтавага накіравання выкарыстання купленай валюты). Аднак гэта статінфармацыя не будзе абмяжоўваць прадпрыемства ў выкарыстанні набытай замежнай валюты.
Нацыянальны банк чакае, што падрыхтаваная адмена мэтавага характару набыцця замежнай валюты забяспечыць большую свабоду прадпрымальніцкай дзейнасці.
Варта адзначыць, што адмена мэтавай куплі замежнай валюты да 1 студзеня 2018 года з’яўляецца адной з умоў атрымання Беларуссю сёмага траншу крэдыту Еўразійскай фонду стабілізацыі і развіцця (на гэты час у краіну паступіла пяць траншаў). У Расеі і Казахстане, якія таксама ўваходзяць у ЕАЭС, мэтавая купля замежнай валюты адсутнічае.
Аналітыкі фінансавага рынку Беларусі прагназуюць, што адмена мэтавай куплі замежнай валюты пройдзе спакойна.
Глядзіце таксама
