Улады прагназуюць рэцэсію ў выпадку стымулявання эканомікі

Як паведамлялася, на мінулым тыдні параметры прагнозу сацыяльна-эканамічнага развіцця на 2020 год разглядаліся на пасяджэнні ўрада. Прэм’ер-міністр Сяргей Румас падчас пасяджэння паведаміў, што ўрад прагназуе на будучы год рост эканомікі ў памеры 2,5%.

Паводле звестак БелаПАН, Міністэрства эканомікі пралічыла і прадставіла два магчымыя эканамічныя сцэнарыі на 2020 год. Першы накіраваны на захаванне макраэканамічнай стабільнасці, а другі — на выкананне паказчыкаў праграмы сацыяльна-эканамічнага развіцця, зацверджанай на 2016—2020 гады.

Паводле ацэнак эканамічных уладаў, у наступным годзе ў краіне рэальна забяспечыць рост ВУП на ўзроўні 2,5%, у тым ліку за кошт знешняга попыту на 1,3%, за кошт унутранага — на 1,2%.

Другі сцэнар развіцця эканомікі Мінэканомікі падрыхтавала з улікам неабходнасці выканання мэтавых параметраў, зацверджаных на пяцігодку. Нагадаем, праграма сацыяльна-эканамічнага развіцця на 2016—2020 гады прадугледжвае рост эканомікі за пяць гадоў не менш чым на 12,1%.

Паводле інфармацыі БелаПАН, Міністэрства эканомікі прадугледжвае, што з улікам запаволення эканомікі ў першым паўгоддзі па выніках 2019-га рост ВУП можа скласці 2,9% (афіцыйная мэта на гэты год раней прадугледжвала рост на 4%). З улікам гэтага ўлады мяркуюць, што для выканання праграмы сацыяльна-эканамічнага развіцця на пяцігодку эканоміка павінна расці ў 2020 годзе не на 2,5%, а на 5,8%.

Паводле ацэнак Мінэканомікі, каб забяспечыць рост ВУП на 5,8% за кошт знешняга попыту, экспарт павінен вырасці на 11% у 2020 годзе, што, на думку міністэрства, нерэальна. Для забеспячэння высокіх тэмпаў эканамічнага росту за кошт унутранага попыту, паводле ацэнак Мінэканомікі, у эканоміку спатрэбіцца дадаткова накіраваць каля 10 млрд рублёў.

На думку эканамічных уладаў, інфляцыйныя працэсы і націск на валютны курс з прычыны штучнага стымулявання ВУП прывядуць да таго, што базавыя ўмовы (коштавая і фінансавая стабільнасць) для эканамічнага росту будуць страчаныя. Пры такім сцэнарыі пасля паскарэння эканомікі ў 2020 годзе краіна можа сутыкнуцца з рэцэсіяй (мінус 1,5% ВУП штогод у 2021—2022 гадах).

На думку незалежных экспертаў, малаверагодна, што для выканання параметраў праграмы сацыяльна-эканамічнага развіцця на 2016—2020 гады ўлады пойдуць на маштабнае стымуляванне ўнутранага попыту ў будучым годзе.

„Улады за апошнія гады ўсвядомілі каштоўнасць фінансавай і цэнавай стабільнасці. Вядома, ключавыя рашэнні ў нас прымаюцца на ўзроўні кіраўніка дзяржавы. Але, хутчэй за ўсё, улічваючы вельмі негатыўныя наступствы сцэнарыя стымулявання эканомікі, аргументы ўрада на палітычным узроўні будуць пачутыя”, — адзначыў у каментары БелаПАН старшы навуковы супрацоўнік Беларускага эканамічнага даследча-адукацыйнага цэнтра (BEROC) Дзмітрый Крук.

Эксперты адзначаюць, што, нягледзячы на будучую выбарчую кампанію, ва ўладаў няма нават палітычнага сэнсу ісці на стымуляванне ўнутранага попыту.

„У 2015-м, нягледзячы на рэцэсію і выбарчую кампанію, улады не пайшлі на штучны разагрэў эканомікі. Цяпер сітуацыя ў краіне лепшая, чым тады, таму не відаць нават адмысловага палітычнага сэнсу штучным чынам стымуляваць эканоміку”, — падкрэсліла ў каментары БелаПАН акадэмічны дырэктар BEROC Кацярына Барнукова.

belapan.by