Важна мінімізаваць уплыў эпідэміі на гаспадарчую дзейнасць
Дэпутаты павінны спрыяць мінімізацыі ўплыву эпідэміі на гаспадарчую дзейнасць Беларусі, заявіў старшыня Палаты прадстаўнікоў Нацыянальнага сходу Уладзімір Андрэйчанка 2 красавіка на адкрыцці вясновай сесіі ніжняй палаты парламента.
Паводле яго слоў, сітуацыя на нафтавых рынках на фоне нафтавых войнаў і ўспышкі каронавіруса «складваецца няпростая: у шматлікіх краінах спыняюцца прадпрыемствы і цэлыя галіны, падае дзелавая актыўнасць».
«На жаль, пандэмія ўносіць свае карэктывы і ў жыццё Беларусі, – заявіў Андрэйчанка. – Зразумела, згушчаць фарбы не варта, але і спрашчаць гэтую праблему таксама нельга, бо галоўнае для нас – клопат пра здароўе і жыццё нашых грамадзянаў. Своечасовае прыняцце дзяржавай дакладных прэвентыўных мер дазволіла ўзяць сітуацыю пад кантроль. Вельмі важна, што грамадзяне з разуменнем ставяцца да таго, што адбываецца, захоўваюць спакой і вытрымку. Але самай глыбокай удзячнасці заслугоўваюць нашы лекары – за прафесіяналізм, мужнасць і самаадданасць, якія яны выказваюць, выконваючы сваю высакародную місію. Падтрымаць іх у гэты няпросты час – наш абавязак».
«Не менш актуальная задача – мінімізацыя ўплыву эпідэміі на гаспадарчую дзейнасць. Нам трэба яшчэ раз прадумаць формы падтрымкі дзелавой актыўнасці, прасачыць, каб людзі своечасова атрымлівалі зарплаты, пенсіі, каб ім аказваліся неабходныя сацыяльныя паслугі. Вядома, для падтрымання стабільнасці важная сумесная салідарная праца дзяржавы і грамадства, суб’ектаў гаспадарання і грамадзянаў, бо адказнасць тут размяркоўваецца на ўсіх практычна ў роўнай ступені», – дадаў старшыня ніжняй палаты.
Дэпутаты, сказаў ён, павінны «займаць больш актыўную пазіцыю ў гэтым пытанні». Ім трэба ведаць, «што адбываецца на прадпрыемствах і ў арганізацыях акругі, на месцах, тлумачыць людзям, якія меры прымаюцца для барацьбы з вірусам, чаму так важна выказваць самадысцыпліну і дакладна выконваць рэкамендацыі медыкаў».
Разам з тым, паводле слоў Андрэйчанкі, галоўнай палітычнай падзеяй вясновай сесіі Палаты прадстаўнікоў стане «пасланне кіраўніка дзяржавы беларускаму народу і парламенту, ключавыя палажэнні якога будуць пакладзеныя ў аснову фармавання стратэгіі развіцця Беларусі ў новым пяцігоддзі».
«Гэтая стратэгія павінна не толькі мець антыкрызісны характар, але і працаваць на перспектыву, на эфектыўнае выкарыстанне нашай галоўнай канкурэнтнай перавагі – чалавечага капіталу і тых галін эканомікі, якія стануць драйверамі ўпэўненага развіцця краіны ў XXI стагоддзі», – падкрэсліў парламентарый.
Глядзіце таксама
