Віктар Маргелаў: Манапалізацыя гандлю перавысіла крытычную кропку
Сустаршыня Рэспубліканскай канфедэрацыі прадпрымальніцтва Віктар Маргелаў распавёў пра гандлёвых манапалістаў і рэгуляванне цэнаў.
Міністэрства антыманапольнага рэгулявання і гандлю хоча зрабіць больш жорсткім механізм дзяржаўнага рэгулявання цэн. Праект адпаведнага ўказа вынеслі на грамадскае абмеркаванне.
Згодна з апублікаваным дакументам, прадпрыемствы гандлю будуць пазбаўлены магчымасці атрымліваць выплаты для прасоўвання сацыяльна значных тавараў, цэны на якія рэгулююцца дзяржавай.
Віктар Маргелаў: Зразумела, чаму сёння Міністэрства антыманапольнага рэгулявання і гандлю ідзе на такія крокі. Манапалізацыя гандлю перавысіла крытычную кропку, і на сацыяльна значныя тавары манапалісты робяць вельмі сур’ёзныя нацэнкі. Суадносна, народ абураецца.
А вось у малых прадпрыемстваў нацэнкі якраз нізкія, але яны таксама прадаюць па такіх жа коштах.
РР: Які выхад з сітуацыі?
Віктар Маргелаў: Мы лічым, што няма сэнса рэгуляваць манапаліста, бо ў такім выпадку давядзецца адсочваць іх кожны крок. Гэта вельмі складаная рэч, на якую спатрэбіцца шмат часу. Паставяць адзін бар’ер – знойдуць варыянт, як яго абыйсці. Прыдумаюць другі – і яго можна абмінуць. І так можа працягвацца да бясконцасці.
Мы пра гэта казалі яшчэ ў сакавіку, калі рыхтавалі праект указа аб абмежаванні манапалістычнай дзейнасці. На жаль, гэты праект згубіўся недзе ў кабінетах чыноўнікаў, хаця ён больш сістэмна вырашаў бы вышэйпазначаную праблему. Таму зараз дзяржава робіць так, як лічыць магчымым гэта сёння рабіць без указа.
Кастусь Заблоцкі, Беларускае Радыё Рацыя
Фота з сайта: ex-press.by.
Глядзіце таксама
