Выстава беларускіх вытворцаў Made in Belarus адкрываецца ў Кіеве
Маштабная выстаўка беларускіх вытворцаў Made in Belarus адкрываецца сёння ў Кіеве.
Выстаўка будзе праходзіць з 10 па 14 красавіка ў кіеўскім Міжнародным выставачным цэнтры. Удзел у ёй прымаюць вядучыя беларускія кампаніі, якія прадэманструюць распрацоўкі ў сферах машынабудавання і нафтахіміі, транспарту і лагістыкі, сельскай гаспадаркі і харчавання, лёгкай прамысловасці і турызму.
У прыватнасці, сваю прадукцыю прадставяць такія кампаніі-флагманы ў сферах машынабудавання і прамысловага абсталявання, як БелАЗ, „Амкадор”, МАЗ, МТЗ, „Гомсельмаш”, Беларускі металургічны завод, „Магілёўліфтмаш”, БАТЭ, Магілёўскі металургічны завод. Будуць прадстаўлены ўзоры кар’ернай, сельскагаспадарчай, пасажырскай і дарожна-будаўнічай тэхнікі, стартары і генератары для рухавікоў, ахоўна-пажарныя сістэмы, аптычныя прыборы і дэталі.
Новыя мадэлі кухоннай бытавой тэхнікі гандлёвай маркі Gefest прапануе кампанія „Брэстгазаапарат” – гэта газавыя, газаэлектрычныя і электрычныя пліты, убудоўваемая тэхніка і паветраачышчальнікі.
Нафтахімічную прадукцыю пакажуць прадпрыемствы канцэрна „Белнафтахім”: „ГроднаАзот” (поліамідныя ніці і кампазіцыйныя матэрыялы), „Нафтан” (акрылавыя валокны, поліэтылен, малатанажная хімія), „Магілёўхімвалакно” (сінтэтычныя валокны і ніці, поліэфірныя плёнкі, ПЭТ-прэформы), Завод горнага воску (парафін, ахоўны воск), Гомельскі хімічны завод (змешаныя ўгнаенні), Мазырскі нафтаперапрацоўчы завод (паліва, бітумы). Легкавыя і грузавыя шыны, якія валодаюць рэсурсазберагальнай тэхналогіяй, прадставіць „Белшына”.
Мадэлі інавацыйнага транспарту прэзентуе „Белтранснет”.
Шырокі асартымент дэкаратыўнай касметыкі, а таксама шэраг прафесійных сродкаў для салонаў прыгажосці прадэманструюць буйнейшыя касметычныя прадпрыемствы Беларусі – „Беліта” і „Вітэкс”.
Розныя віды пражы і вырабы з трыкатажу прадставяць швейныя фабрыкі „8 сакавіка” і Аршанскі льнокамбінат. Гэта мужчынскія і жаночыя мадэлі штодзённага адзення, адзення для дзяцей, тэкстыль, тавары для нованароджаных. Шырокі асартымент панчошна-шкарпэтачных вырабаў прапануе кампанія „Контэ Спа”. Новую лінейку жаночых і мужчынскіх сумак, рукзакоў, партфеляў, чамаданаў, партманетаў з натуральнай скуры і штучных матэрыялаў прадэманструе „Галантэя”.
Таксама на выстаўцы Made in Belarus будуць прадстаўлены вытворцы прадуктаў харчавання і напіткаў. У мерапрыемстве прымуць удзел Дзятлаўскі сыраробны завод, Шчучынскі масласырзавод, Навабеліцкі камбінат хлебапрадуктаў. Беларускія кампаніі прэзентуюць сыры, сметанковае масла, муку і паўфабрыкаты, аўсяныя кашы.
„Нацыянальная агенцтва па турызме” прэзентуе турыстычны патэнцыял краіны: раскажа аб унікальнай прыродзе, багатай культурнай спадчыне, помніках сусветнага значэння, а таксама праанансуе правядзенне ў Беларусі спартыўных падзей міжнароднага ўзроўню – Еўрапейскіх гульняў у 2019 годзе і чэмпіянату свету па хакеі-2021.
Выстаўка ў Кіеве будзе суправаджацца дзелавой праграмай, што ўключае галіновыя прэзентацыі беларускіх прадпрыемстваў. Ключавым мерапрыемствам дзелавой праграмы стане канферэнцыя „Украіна-Беларусь: перспектывы супрацоўніцтва”, якая адбудзецца 10 красавіка. У мерапрыемстве прымуць удзел прадстаўнікі дзяржаўных ведамстваў дзвюх краін, а таксама Беларускай гандлёва-прамысловай палаты і Гандлёва-прамысловай палаты Украіны.
Выстаўку Made in Belarus у Кіеве арганізуе Беларуская гандлёва-прамысловая палата. Аператарам выступае выставачнае ўнітарнае прадпрыемства „Белінтэрэкспа” БелГПП. Мерапрыемства праводзіцца пры падтрымцы пасольства Беларусі ва Украіне, Гандлёва-прамысловай палаты Украіны, дзяржаўных органаў і бізнес-асацыяцый дзвюх краін.
