Жыллёвае будаўніцтва скарацілася на 13,3%
У студзені—жніўні 2018 года арганізацыямі ўсіх форм уласнасці пабудавана 22,8 тыс. новых кватэр, вынікае з даных Нацыянальнага статыстычнага камітэта.
Уведзена ў эксплуатацыю 2 млн 24,1 тыс. кв. м агульнай плошчы жылля, што на 13,3% менш, чым у студзені—жніўні 2017 года.
У жніўні пабудавана 185,6 тыс. кв. метраў (на 22,6% менш, чым у жніўні мінулага года, і на 16,4% больш, чым у ліпені 2018-га).
Для грамадзян, якія стаяць на ўліку для паляпшэння жыллёвых умоў, уведзена ў эксплуатацыю 742,1 тыс. кв. м агульнай плошчы, або 36,7% агульнага аб’ёму ўведзенага жылля.
З агульнага аб’ёму ўведзенага жылля для грамадзян, якія стаяць на ўліку для паляпшэння жыллёвых умоў, з выкарыстаннем дзяржаўнай падтрымкі пабудавана 491 тыс. кв. м (на 36,7% больш, чым у студзені-жніўні 2017 года), у шматкватэрных жылых дамах у гарадах — 460,4 тыс. кв. м.
У сельскіх населеных пунктах уведзена ў эксплуатацыю 596,2 тыс. кв. м агульнай плошчы жылля, або 29,5% агульнага ўводу ў краіне.
Заданне на 2018 год па ўводу ў эксплуатацыю жылых памяшканняў устаноўлена ў 4 млн кв. м. Для маючых патрэбу ў паляпшэннi жыллёвых умоў у шматкватэрных дамах у гарадах запланавана пабудаваць 587 тыс. кв. м, з дзяржпадтрымкай — 900 тыс. кв. м.
Сацыяльнага жылля плануецца пабудаваць 679 тыс. кв. м (фінансаванне — 37 млн 405 тыс. рублёў), для шматдзетных сем’яў — 562,6 тыс. кв. м (410 млн 360 тыс.), індывідуальных жылых дамоў агульнай плошчай 1 млн 484 тыс. кв. м (1 млрд 312 млн 460 тыс. рублёў). У гарадах-спадарожніках плануецца пабудаваць 28,7 тыс. кв. м жылля.
„Ёсць некаторыя складанасці ў тэмпах здачы ў эксплуатацыю жылля ў сувязі з тым, што год пачаўся фактычна без запасу. Таму некаторыя аб’екты пачынаюць толькі будаваць, і гэта адбіваецца на тэмпах будаўніцтва. Тэмпы будуць нарастаць, і ёсць упэўненасць, што 4 млн кв. метраў будзе пабудавана. Хоць гэта не так проста з-за недастатковых даходаў насельніцтва. 900 тыс. з дзяржпадтрымкай — гэта строга абавязковы паказчык, які будзе выкананы і міністэрствам, і абласцямі”, — адзначыў раней начальнік упраўлення жыллёвай палітыкі Міністэрства архітэктуры і будаўніцтва Аляксандр Горваль.
Пры гэтым ён адзначыў, што ў сувязі з рэалізацыяй указа прэзідэнта аб субсідзіраванні жыллёвага будаўніцтва ў гэтым годзе дадаткова плануецца прыцягнуць 526 млн рублёў. „Будаўнічы комплекс працуе ўстойліва, і пытанне толькі ў аб’ёмах фінансавання — больш будзе дзяржсродкаў, сродкаў банкаў і грамадзян, больш будзе будавацца жылля. Тэхнічныя і арганізацыйныя магчымасці для гэтага ёсць у прадпрыемстваў усіх форм уласнасці. Мы глядзім з аптымізмам і мяркуем, што ўсе закладзеныя у праграме параметры будуць выкананы”, — заявіў чыноўнік.
