„Зялёныя”: Беларусь стане сметнікам для радыеактыўных адкідаў
У Беларусі для Атамнай электрастанцыі пабудуюць радыяцыйныя могілкі. Айчынныя спецыялісты распрацоўваюць праект па стварэнні пункта пахавання радыеактыўных адкідаў ад Астравецкай АЭС.
Як паведамілі ў Міністэрстве энергетыкі, ужо вядзецца праца над праектам. На думку беларускіх энергетыкаў, гэты пункт дасць магчымасць ізаляваць радыеактыўныя адкіды і не дапусціць іх негатыўнага ўздзеяння на навакольнае асяроддзе.
Старшыня партыі «Зялёныя» Дзмітрый Кучук паведаміў, што поўнасцю ізаляваць радыеактыўныя адкіды немагчыма.
– Тэхналогіі па перапрацоўцы радыеактыўных адкідаў у свеце не існуе. Сітуацыя з гэтым могільнікам прывядзе да таго, што Беларусь стане сметнікам для радыёактыўных адкідаў. Бо калі ёсць атамная станцыя, то адкіды павінны захоўвацца і перапрацоўвацца на тэрыторыі той краіны, дзе яны выпрацоўваюцца. Адпаведна, можна забыць пра развіццё курортнай зоны на Астравеччыне, пра развіццё аграрнай галіны, бо ніхто не захоча купляць прадукты харчавання адтуль.
РР: Спачатку планавалася, што адкіды будуць вывозіцца ў Расею.
Дзмітрый Кучук: У Расеі прыняты закон, у якім прапісана, што радыеактыўныя адкіды на іхнай тэрыторыі не могуць захоўвацца. Іх туды ўвязуць, цягам 10 год яны перапрацуюцца і пасля вярнуцца на тэрыторыю Беларусі. І будуць захоўвацца тысячы гадоў, пакуль чалавецтва не прыдумае тэхналогію цалкам іх абясшкодзіць.
РР: Партыя “Зялёныя” плануе рабіць заявы, праводзіць акцыі ў сувязі з будаўніцтвам АЭС?
Дзмітрый Кучук: Мы ўвесь час пратэстуем супраць гэтага. Але, на жаль, зараз насельніцтва зусім не рэагуе. Часу застаецца ўсё меньш. Праз два гады завязуць радыеактыўнае паліва і ўсе мы будзем жыць фактычна ў зусім іншай краіне з пункту гледжання бясьпекі. Трэба пратэставаць, класціся на рэльсы, нешта рабіць, бо сітуацыя сумная. Трэба заклікаць міжнародную супольнасць, каб яна падтрымлівала нас. Застаецца ўсё меньш часу, каб спыніць гэтае будаўніцтва.
РР: Калі падагульніць, то бясьпечнай сістэмы захоўвання радыеактыўных адкідаў пры сённяшніх тэхналогіях не можа быць увогуле?
Дзмітрый Кучук: Так. Такой тэхналогіі ў свеце ўвогуле не існуе. Пры любой атамнай станцыі, у той жа Літве, напрыклад, ёсць могільнікі, дзе гэтыя адкіды захоўваюцца. У Германіі спрабавалі закладаць адкіды ў саляныя шахты, але гэта таксама захоўванне. Бо цалкам перапрацаваць радыеактыўныя адкіды немагчыма.
Як паведамляе Міністэрства энергетыкі, для дасягнення бяспекі пахавання радыёактыўных адкідаў створаны матэматычныя мадэлі і вылічальныя праграмы, каб разлічыць працэсы міграцыі радыенуклідаў з сістэмы пахавання ў геасферу праз унутраныя, знешнія інжынерныя і прыродныя бар’еры прыпаверхневага сховішчы. Беларуская АЭС будуецца за кошт крэдыту Расеі. Першая пастаўка ядзернага паліва на БелАЭС чакаецца ў канцы 2018 года.
Гутарыў Антон Разумоўскі, Беларускае Радыё Рацыя
Фота belgazeta.by і БелаПАН
