40-гадовы мянчук падазраецца ў вырабе дзіцячай парнаграфіі
Галоўным следчым упраўленнем Следчага камітэта Беларусі расследуецца крымінальная справа аб вырабе матэрыялаў парнаграфічнага характару.
Як паведамляе аддзел інфармацыі і сувязі з грамадскасцю СК, у верасні 2018 года супрацоўнікі дэпартамента кіберпаліцыі Нацыянальнай паліцыі Украіны прадставілі беларускім праваахоўным органам інфармацыю пра тое, што на тэрыторыі Беларусі знаходзіцца карыстальнік інтэрнэту, які можа мець дачыненне да вырабу, рэкламавання і распаўсюджвання парнаграфічных матэрыялаў з выявай малалетніх.
Атрыманыя звесткі былі правераны ў ходзе аператыўна-вышуковых мерапрыемстваў супрацоўнікамі ГУНіСГЛ МУС Беларусі, якія ўстанавілі асобу 40-гадовага мінчаніна.
Следчым камітэтам па факце вырабу, рэкламавання і распаўсюджвання парнаграфічных матэрыялаў з выкарыстаннем заведама малалетніх распачатая справа па ч. 3 арт. 343-1 Крымінальнага кодэкса.
Па падазрэнні ў здзяйсненні ўказанага злачынства 5 лютага мужчына затрыманы.
Паводле дадзеных следства, у 2017 годзе падазраваны займаўся стварэннем сцэнарыяў фільмаў парнаграфічнага зместу. Па гэтых сцэнарыях двое жыхароў Украіны выраблялі відэаролікі з удзелам малалетняга. Устаноўлены выпадак, калі ў здымках удзельнічала пяцігадовае дзіця. Для забеспячэння канспірацыі пры разліках падазраваны выкарыстоўваў крыптакашалёк. У далейшым адзнятыя відэаматэрыялы размяшчаліся на спецыялізаваных сайтах з мэтай продажу.
Следчымі па месцы жыхарства падазронага праведзены вобыск, падчас якога канфіскаваная камп’ютарная тэхніка, а таксама электронныя носьбіты з інфармацыяй. Вядома, што мужчына працуе кіраўніком аддзела ў адной з арганізацый і раней да крымінальнай адказнасці не прыцягваўся.
Расследаванне справы працягваецца.
