500 еўра штрафу – за супрацу з тэлеканалам “Белсат”
Да штрафу каля 500 еўра ў эквіваленце засуджаныя на дваіх гарадзенскія журналісты-фрылансеры Алесь Дзянісаў і Алесь Кіркевіч.
Алесь Дзянісаў
Судзіў журналістаў – cуддзя Юры Казакевіч. Журналісты былі асуджаны за відэасюжэт пра выставу літоўскіх лялек у Гародні, размешчаны на сайце тэлеканала “Белсат”.
За гадзіну судовага пасяджэння, суддзя заслухаў сведак, прысутным паказалі сюжэт, і не выходзячы з кабінету суддзя агучыў прысуд – па 25 базавых велічыняў кожнаму журналісту.
Уладзімір Хільмановіч і Алесь Дзянісаў
Алесь Дзянісаў здзіўлены паводзінамі суддзі:
– Адзінае, што ў гэтай сітуацыі канешне самае складанае, можна сказаць трагічнае канкрэтна для мяне, улады не ведаю за што і навошта перакрываюць паветра, не даюць працаваць.
Гарадзенскі праваабаронца Уладзімір Хільмановіч:
– Альбо кіраўнік дзяржавы не разабраўся яшчэ дагэтуль з гэтымі справамі журналістаў-фрылансераў, альбо гэта былі проста словы кінутыя ў час прэс-канферэнцыі. Юрыдычна ўся сітуацыя выглядае татальна абсурдна, абсурдней з кожным працэсам.
Для Алеся Дзянісава і Алеся Кіркевіча гэта ўжо трэцяя справа за супрацу з тэлеканалам “Белсат”, аднак журналісты не губляюць надзеі і будуць абскарджваць пастанову ў абласным судзе.
Беларускае Радыё Рацыя, Гародня
