Абарона Сяргея Ціханоўскага накіравала ў Генпракуратуру скаргу
Абарона Сяргея Ціханоўскага 4 мая накіравала ў Генеральную пракуратуру скаргу на парушэнне права падабароннага на прыватнасць пры зносінах з адвакатам, паведаміла БелаПАН адвакат Наталля Мацкевіч.
Увечары 28 красавіка на тэлеканале ОНТ у фільме „Забіць прэзідэнта” быў паказаны фрагмент размовы Аляксандра Лукашэнкі з Сяргеем Ціханоўскім — відэаблогерам, мужам беларускага дэмакратычнага лідара, экс-кандыдата ў прэзідэнты Святланы Ціханоўскай у СІЗА КДБ 10 кастрычніка мінулага года. З яго вынікае, што Лукашэнка ведае змест канфідэнцыйнай гутаркі Ціханоўскага з адвакатам пра яго сына Колю. У фільме таксама паказалі фрагмент гутаркі Ціханоўскага з адвакатам. Верагодна, менавіта пра гэтыя зносіны Лукашэнка ўзгадаў падчас размовы ў СІЗА.
Мацкевіч адзначыла, што размова пра малодшага сына Лукашэнкі паміж ёй і Ціханоўскім адбылася летам 2020 года.
Паводле яе слоў, паказаныя ў эфіры ОНТ кадры яе сустрэчы з падабаронным з’яўляюцца „грэбаваннем з боку дзяржканала заканадаўствам Рэспублікі Беларусі”.
„Таямніца зносін з адвакатам — гэта як таямніца споведзі, як медыцынская таямніца, не кажучы ўжо пра тое, што гэта канстытуцыйнае, фундаментальнае права на прыватнасць пры зносінах з абаронцамі, прадугледжанае міжнароднымі дакументамі і заканадаўствам Рэспублікі Беларусь, і яно непахіснае і не можа быць ні пры якіх умовах абмежаванае”, — падкрэсліла Мацкевіч.
Адвакат звярнула ўвагу, што ў заканадаўстве ёсць шэраг нормаў, якія рэгулююць гэтыя пытанні: Крымінальна-працэсуальны кодэкс, закон аб адвакатуры, унутраная інструкцыя МУС аб тым, у якіх умовах праходзяць спатканні, закон аб парадку і ўмовах утрымання асоб пад вартай. „Згодна з гэтым дакументам павінна быць забяспечаная канфідэнцыйнасць. Гэта азначае, што змест размовы адваката і кліента ніхто не павінен ведаць, тым больш запісваць і даводзіць да агульнага ведама”, — канстатавала яна.
У скарзе абарона просіць Генпракуратуру, якая павінна сачыць за выкананнем заканадаўства, прызнаць парушэнне гэтага права, усталяваць органы і асоб, адказных за яго парушэнне, прыняць меры для таго, каб гэта не паўтаралася ў будучыні.
„Гэта праблема не адной сітуацыі. Калі кабінеты ў следчым ізалятары абсталяваныя такім чынам, калі так можна, то любы адвакат і любы чалавек, які знаходзіцца пад вартай, можа апынуцца ў такой сітуацыі. Гэта не прыватная праблема, а па сутнасці праблема ўсяго права на абарону”, — перакананая адвакат.
Абарона Ціханоўскага таксама накіравала па гэтым факце зварот у Беларускую рэспубліканскую калегію адвакатаў, у якім згадала, што калегія закліканая ў такіх сітуацыях абараняць правы адвакатаў, у тым ліку на канфідэнцыйныя зносіны з кліентам. „Калегія павінна ў межах сваёй кампетэнцыі на гэты факт адрэагаваць нават без майго звароту”, — канстатавала Мацкевіч.
Паводле інфармацыі Следчага камітэта, Ціханоўскага абвінавачваюць у арганізацыі масавых беспарадкаў у 2020 годзе (ч. 1 арт. 293 Крымінальнага кодэкса); распаўсюджванні групай асоб паводле папярэдняй змовы матэрыялаў, скіраваных на распальванне сацыяльнай варожасці супраць прадстаўнікоў улады і праваахоўных органаў (ч. 3 арт. 130 КК); пагрозах на адрас старшыні Цэнтральнай камісіі па выбарах і правядзенні рэспубліканскіх рэферэндумаў Лідзіі Ярмошынай (ч. 2 арт. 191 КК); арганізацыі групавых дзеянняў, якія груба парушаюць грамадскі парадак і спалучаныя з ужываннем гвалту ў дачыненні да прадстаўнікоў улады (ч. 1 арт. 342 КК).
Крымінальная справа ў дачыненні да Ціханоўскага і „набліжаных да яго асоб” перададзеная пракурору для накіравання ў суд.
Глядзіце таксама
