Абвешчаны прысуд па справе гібелі бацькі прафесара Астроўскага
1 год і 6 месяцаў на пасяленні – такі прысуд абвешчаны ў Гародні па крымінальнай справе супраць Віктара Шабалоўскага, якога абвінавацілі ў наездзе на бацьку прафесара Алеся Астроўскага. Справа цягнулася амаль тры гады, але яе вынікам ніхто не задаволены.
Кажа сын загінулага Алесь Астроўскі:
– Я разлічваў, што прысуд будзе апраўдальны, і што суддзя проста напіша нейкае патрабаванне да следчых органаў, працягнуць расследаванне і паспрабуюць разгледзець другую версію. Па ўсёй хадзе справы выпадае, што бацька не адказваў на пытанні, а як высвятляецца, ён быў цалкам кантактны, яму гаварылі зрабі тое, зрабі гэта. Ён прасіў закрыць гараж, ён прасіў адвезці. Пры гэтым не ён сам нібы, са слоў сведак. Дык што ж адбылося? Мы будзем пісаць пратэст у больш высокія судовыя інстанцыі з просьбай адмяніць гэтае рашэнне, працягнуць расследаванне і скласці ў адзіную сістэму дадатковы комплекс фактаў.
Доказаў вінаватасці абвінавачанага, на думку прафесара Астроўскага, следства не прадставіла, абвінавачванне базавалася на дапушчэннях. Нібыта той парушыў правілы дарожнага руху, наехаў на старога чалавека, у выніку чаго той памёр. Іншыя версіі смерці Аляксандра Астроўскага 25 сакавіка 2013 года – следства адкінула.
Беларускае Радыё Рацыя, Гародня
