Аб’яўлены збор сродкаў сям’і журналіста Васіля Мацкевіча
Дапамагчы сям’і журналіста Васіля Мацкевіча заклікаюць у Пінску на Берасцейшчыне.
Адпаведны збор сродкаў пачаўся на платформе molamola.by. Таксама можна пакінуць свае ахвяраванні ў рэдакцыі „Медыя-Палессе”, — распавёў дырэктар “МП компані” Максім Горда:
– Натуральна, мы аказваем усю магчымую дапамогу, але трэба разумець, што мы не маем такіх рэсурсаў, як вялікія рэдакцыі. Хочацца звярнуцца да людзей, не толькі да журналісцкай супольнасці, а ў тым ліку да тых людзей, якіх хвалюе будучыня нашай краіны, бо такіх людзей як Васіль, на жаль, адзінкі.
46-гадовага журналіста «Медыя-Палессе» Васіля Мацкевіча пахавалі ў вёсцы Завідчыцы Пінскага раёна, дзе спачывае яго маці. Адпяванне адбудзецца дыстанцыйна ў грэка-каталіцкай царкве ў Берасці.
Згодна афіцыйнай версіі, смерць журналіста была выклікана двухбаковай пнеўманіяй. Але родныя, знаёмыя і калегі не выключаюць, што першы тэст на СOVID-19 быў станоўчым.
Беларускае Радыё Рацыя, Берасце
Фота media-polesye.by
