Адноўленая крымінальная справа па факце збіцця гея Міхаіла Пішчэўскага
Упраўленне Следчага камітэта Цэнтральнага раёна Менска перадало ў пракуратуру для далейшага накіравання ў суд крымінальную справу па факце збівання і смерці мянчука Міхаіла Пішчэўскага, паведаміла БелаПАН афіцыйны прадстаўнік СК Юлія Ганчарова.
Ноччу 25 мая 2014 года Пішчэўскі быў моцна збіты на выхадзе з мінскага клуба, у якім праходзіла гей-вечарына. Наведвальнікаў, якія выходзілі з установы, пачалі абражаць маладыя людзі, якія знаходзіліся паблізу, пасля чаго адбыўся канфлікт. Пішчэўскі сур’ёзна пацярпеў у бойцы, а тыя, хто нападаў, у тым ліку Дзмітрый Лукашэвіч, які збіў яго, уцяклі і з аркі суседняга дома назіралі за прыездам хуткай дапамогі і міліцыі. Там маладых людзей заўважыў адзін з відавочцаў, які самастойна затрымаў Лукашэвіча і перадаў яго супрацоўнікам міліцыі.
Лукашэвіч быў прызнаны вінаватым па ч. 1 арт. 339 (наўмысныя дзеянні, якія груба парушаюць грамадскі парадак і выказваюць відавочную непавагу да грамадства (хуліганства), суправаджаюцца прымяненнем насілля) і арт. 155 (прычыненне цяжкага цялеснага пашкоджання па неасцярожнасці) Крымінальнага кодэкса. Яго прыгаварылі да двух гадоў і васьмі месяцаў пазбаўлення волі з адбываннем пакарання ў калоніі агульнага рэжыму. Абвінавачваны таксама павінен быў выплаціць пацярпеламу 150 млн. рублёў, яго маці — 63 млн. рублёў.
20 жніўня 2015 года Лукашэвіч выйшаў з калоніі па амністыі.
Пішчэўскі памёр 27 кастрычніка 2015 года.
Паводле слоў Ганчаровай, крымінальная справа пасля смерці Пішчэўскага была адноўлена ў сувязі з „наступленнем больш цяжкіх наступстваў у выглядзе смерці пацярпелага”. „Расследаванне пачалося па новаадкрытых акалічнасцях, — сказала Ганчарова. — Следства прызначыла і атрымала вынікі пасмяротнай судова-медыцынскай экспертызы, якая ўстанавіла, што смерць наступіла ад атрыманых цялесных пашкоджанняў. Такім чынам, устаноўлена прычынна-следчая сувязь паміж дзеяннямі абвінавачванага і смерцю Пішчэўскага”.
Ганчарова паведаміла, што следства выставіла абвінавачванаму канчатковае абвінавачанне па ч. 1 арт. 144 (прычыненне смерці па неасцярожнасці) і ч. 1 арт. 339. У дачыненні да Лукашэвіча абрана мера стрымання ў выглядзе падпіскі аб нявыездзе і належных паводзінах.
Прадстаўнік СК адзначыла, што ўсе папярэднія прыгаворы суда адмененыя і будзе новы разгляд справы. „Адбыццё пакарання згодна з заканадаўствам будзе залічана ў наступным”, — сказала яна.
У той жа час праваабаронца Таццяна Равяка, якая раней адсочвала разгляд гэтай крымінальнай справы, кажа, што ў яе дваякае стаўленне да інфармацыі аб аднаўленні справы. „Несумненна, я лічу, з самага пачатку прыгавор суда быў не зусім адэкватным цяжару ўчыненага і наступствам і тэрміну пакарання”, — сказала яна.
З іншага боку, кажа Равяка, ні раней, ні цяпер у справе не гаворыцца пра матыў нянавісці, які стаў асновай злачынства. „Гэтая сітуацыя ўзнікла таму, што ў аднаго чалавека быў цалкам выразны матыў нянавісці да прадстаўнікоў пэўнай сацыяльнай групы. У гэтай справе гэта застаецца за рамкамі, — падкрэсліла Равяка. — І вельмі не хапае пасылу грамадству, што злачынствы на глебе нянавісці знаходзяцца пад асаблівым кантролем”.
