„Ахова птушак Бацькаўшчыны” зладзіла канферэнцыю
У Гародні прайшла канферэнцыя гарадзенскай абласной структуры грамадскага аб’яднання „Ахова птушак Бацькаўшчыны”.
Супольнасць назіральнікаў за птушкамі мае шырокую адукацыйню базу: заахвочвае людзей шанаваць птушыны свет, навакольнае асяроддзе, актыўна супрацоўнічае з заканадаўцамі ў сферы аховы навакольнага асяроддзя. Падчас канферэнцыі сябры арганізацыі змаглі пазнаёміцца з выставай фотамастака-анімаліста Сяргея Печарыцы, які сваіх „птушак на кардоне” ствараў дзесяць гадоў.
– Кожны фотаздымак нясе кавалачак інфармацыі, шлях да спазнання чагосьці незвычайнага. Гэта вельмі цікава. Робіш адзін добры кадр, а пасля хочацца зрабіць яшчэ лепшы. Кожны год гэта новая сустрэча і штосьці новае.
У склад грамадскай арганізацыі зараз уваходзіць больш як 2170 сябраў, 670 валанцёраў і 14 мясцовых аддзяленняў. Як можна захапіцца назіраннем за птушкамі, кажа ўдзельніца канферэнцыі Наталля Кавалеўская:
– Заўсёды гэтым цікавілася. Потым пачала шукаць у інтэрнэце і там натыкнулася на Дзмітрыя Вінчэўскага. Гады два чытала ягоныя публікацыі. Пасля ў фэйсбуку прачытала, што адкрываюцца ва УЗВ курсы па вывучэнні птушак. І я тады пайшла на гэты курс і ўсё больш і больш захапляюся.
Сёлета птушкай году стаў вялікі арлец, якому, падчас канферэнцыі было прысвечана некалькі выступаў. Гэты від у Беларусі сямейства шуляковых, імкліва змяньшаецца. Максімальная колькасць гнездавання 150 параў.
Якуб Сушчынскі, Беларускае Радыё Рацыя, Гародня
