Акцыя грузаперавозчыкаў ля Дома ўрада не адбылася
Акцыя грузаперавозчыкаў, якая была запланаваная на раніцу 4 лютага ля Дому ўраду, не адбылася.
З самай раніцы на выхадах з метро ўзмоцненыя нарады міліцыі. Каля Дома ўрада стаяць два аўтобусы са спецназам. А каля БДУ — «Газель» спецведамства.
Напярэдадні вечарам арганізатар акцыі грузаперавозчыкаў Сяргей Штода быў арыштаваны і пакараны судом на 15 сутак.
Вечарам 3 лютага дырэктар фірмы міжнародных грузаперавозак Сяргей Штода накіраваўся на сустрэчу з віцэ-прэм’ерам Васілём Мацюшэўскім. Ён спадзяваўся дамовіцца пра скасаванне штрафаў за нібыта парушэнні правілаў перавозак грузаў у рамках сістэмы BelToll. Пасля таго як Сяргей Штода накіраваўся ў Саўмін, сувязь з ім абарвалася, пазней яго засудзілі нібыта за лаянку. Сёння ў прызначаны час ніхто не прыйшоў, апрача журналістаў і супрацоўнікаў міліцыі ў цывільным.
Беларускія грузаперавозчыкі абвінавачваюць улады ў спробе знішчыць недзяржаўны сектар міжнародных транспартных паслугаў і ў адмове правесці абяцаную ім амністыю па штрафах за карыстанне платнымі дарогамі BelToll.
Беларускае Радыё Рацыя
Глядзіце таксама
