У Берасці судзяць блогера Сяргея Пятрухіна (абноўлена)
У другі дзень працэсу над блогерам Сяргеем Пятрухіным, як і днём раней, зала судовых паседжанняў была запоўнена супрацоўнікамі міліцыі ў цывільным.
Сваімі ўражаннямі ад гэтага факту падзяліўся берасцейскі грамадскі актывіст Віталь Казак, які прыйшоў падтрымаць блогера ў суд:
– Абурае, што зала цалкам была запоўнена супрацоўнікамі міліцыі. А простых людзей не пусцілі. Але я змог прайсці ў зал, як і яшчэ некалькі чалавек. Канешне ж, кіраўніцтва міліцыі зрабіла паслабленне, каб нехта падтрымліваў абвінавачванага. Я адмыслова ўзяў бінокль, каб глядзець рэчавыя доказы, у тым ліку і лысіны, паглядзець у вочы, твары суддзі, пракурору.
„Яны займаюць усю залу, каб перашкодзіць тым ахвотным папрысутнічаць на працэсе, якія прыйдуць падтрымаць Пятрухіна. Бо месцаў для ўсіх вядома не хопіць”, – падсумоўваюць праваабаронцы.
* * *
Скончыўся другі дзень працэсу над берасцейскім блогерам Сяргеем Пятрухіным, якога вінавацяць у „Абразе” і „Паклёпе” ў адносінах да супрацоўнікаў міліцыі.
Былі дапытаны сведкі з ліку тых, хто згодна з ролікамі Пятрухіна, пацярпеў ад супрацоўнікаў міліцыі. Ахвяры супрацьпраўных дзеянняў сілавіко, выступілі ў судзе на баку блогера:
– Прыйшоў яшчэ адзін чалавек, якога збіў участковы Сяргей Пятровіч Ігнацюк. Гэта было нечакана для яго. Ён два разы збіў берасцейца. Гэта можа паўплываць на ягоны далейшы лёс. Бо ў нармальнай краіне гэтым адразу б зацікавіліся.
Акрамя таго, разбіраюць яшчэ адзін эпізод крымінальнай справы – „Абраза”, у дачыненні да супрацоўніка міліцыі Сяргея Ігнацюка. Пятрухін прадставіў суддзі Аляксандру Семянчуку, які вядзе працэс, вынікі экспертызы:
– Экспертызу правёў прафесар Акадэміі навук, ён напісаў: непрыстойнай формы няма. І гэты каментар не з’яўляецца публічна дэманструемым творам.
Другі дзень скончыўся каля 16:00. Працяг у панядзелак, 15 красавіка ў 15:00 у судзе Ленінскага раёна Берасця.
Сяргей Пятрухін у сваіх роліках выкрывае карупцыйныя схемы чыноўнікаў, свавольства сілавікоў і актыўна асвятляе сітуацыю вакол акумулятарнага завода. Праваабарончыя арганізацыі ўжо заявілі, што гэта справа палітычная, з дапамогай якой цяпер спрабуюць „закрыць рот блогеру”.
* * *
Прыкладна ў 16:30 скончыўся першы дзень працэсу над блогерам Сяргеем Пятрухіным. Большасці журналістаў, праваабаронцаў і тых, хто прыйшоў яго падтрымаць, не знайшлося месца ў вялікай зале паседжанняў. Пра тое, што адбывалася за дзьвярыма, апавядае Сяргей Пятрухін:
– Самыя яскравыя моманты – гэта тое, што ў зале былі міліцыянты ў чалавечай вопратцы. То бок, яны запаланілі ўсю залу. Яны прыйшлі яшчэ да таго, як адчынілі будынак суда з чорнага ўваходу. Пасля абеду таксаам – цэлая зала міліцыянтаў. Гэта цалкам палітызаваны працэс, дзе мне паказваюць, што мы не дамо табе больш размаўляць. І мы з табой можам зрабіць усё, што заўгодна. І ўсё, што заўгодна можам сфабрыкаваць. І гэты парцэс быў цалкам зачынены. Бо на першым паседжанні было пяць чалавек, а астатнія міліцыянты. А на другім – ні-вод-на-га. І тое, што там прысутнічала кіраўніцтва – намеснік кіраўніка УУС Берасцейскага аблвыканкама, сведчыць пра тое, што я замоўлены.
„Мала таго што там нічога няма, дык яны яшчэ гэтую справу крыміналізуюць. Я не чуў, напрыклад, каб справу за „Абразу” ці „Паклёп” заводзілі супраць вадзіцеля хуткай дапамогі”, – падсумаваў Сяргей Пятрухін. Працяг 10 красавіка ў 11:00 у судзе Ленінскага раёна Берасця.
* * *
Каля дзесяці чалавек, з ліку тых хто прыйшоў падтрымаць блогера Сяргея Пятрухіна, у судзе Ленінскага раёна Берасця атрымалі позвы ў міліцыю ў якасці сведкаў.
Большасць з тых хто прыйшоў, прымалі ўдзел у мінуланядзельнай акцыі па „кармленні галубоў” і шэсці, што праводзіцца ў знак пратэсту супраць завода АКБ „АйПаўэр”.
Сітуацыю пракаментаваў праваабаронца Уладзімір Вялічкін:
– Як толькі той прайшоў першы кардон, яго сустракаў маёр Селяйковіч і адразу даставаў папершчыну і казаў: вам позва на тры гадзіны на пятніцу ў Ленінскі РАУС. Пытаецца: У якасці каго? Адказвае: Сведкі. А па якой справе? Там даведаецеся. Ёсць меркаванне, што тыя, хто прыйдзе на пятніцу на 15 гадзін, выйдзе толькі ў панядзелак.
Вялічкін паведамляе, што ў выпадку, калі ўсіх тых, хто з’явіцца па позве ў пятніцу ў Ленінскі РАУС і неўзабаве будзе затрыманы па іншых матывах, то лепшай падтрымкай для іх будзе больш масавы ўдзел берасцейцаў у нядзельным кармленні галубоў. „Такім чынам сілавікі спрабуюць выбіць актыўных удзельнікаў пратэстаў”, – падсумаваў праваабаронца.
***
Суд Ленінскага раёна Берасця разглядае крымінальную справу Сяргея Пятрухіна.
За працэсам над берасцейскім блогерам, якога вінавацяць у „Паклёпе” і „Абразе” міліцыянтаў, назірае экс-палітвязень і кіраўнік Праваабарончага цэнтру “Вясна” Алесь Бяляцкі:
– Фактычна нашы будні праваабаронцаў, калі мы бярэм удзел у палітычных працэсах, – а гэты працэс, безумоўна, мае палітычную падкладку. І некалькі дзён таму больш за дзесяць праваабарончых арганізацый, у тым ліку і ПЦ “Вясна”, Беларускі Хельсінкскі Камітэт, БАЖ і іншыя, прынялі супольную заяву, дзе мы адназначна называем гэты працэс палітычна матываваным. Мы лічым, што беларускія ўлады, пераследуючы Сяргея Пятрухіна, парушаюць як нашу Канстытуцыю, так і міжнародныя пагадненні ў сферы распаўсюду інфармацыі, у сферы свабоды права людзей атрымліваць інфармацыю.
У якасці пацярпелых па тым ці іншым эпізодзе крымінальнай справы праходзяць чатыры супрацоўнікі міліцыі. Працэс вядзе суддзя суда Ленінскага раёна Берасця Аляксандр Семянчук, вядомы па разглядах справаў „дармаедаў”, праціўнікаў завода АКБ і журналістаў недзяжаўных выданняў.
Крымінальны працэс над Сяргеем Пятрухіным праходзіць фактычна ў закрытым рэжыме. Пра гэта паведамляюць берасцейцы, якія прыйшлі падтрымаць блогера, аднак пры гэтым амаль ніводзін з іх не здолеў патрапіць у саму залу:
– Самую вялікую залу сёння прадаставілі. Дзякуй! Але ўся гэтая зала была занятая супрацоўнікамі Ленінскага РАУС. І сесці простым людзям, якія прыйшлі падтрымаць, ужо не было дзе. Мы ўсе зайшлі. Я асабіста папрасіла хлопцаў з Ленінскага РАУС даць мне месца, так як я жанчына, але ніхто не адрэагаваў. Таму мы сталі ціхенька каля сцяны. Але суддзя адмовіўся весці працэс. Ён сказаў, калі хтосьці знойдзе месца, дзе сесці, хай застаецца, а астатніх папрасіў пакінуць залу суда. Але ніхто не пайшоў, бо людзі рэальна хацелі паглядзець у чым там справа. І тады ўжо суддзя выклікаў АМАП.
Калі ў першай палове дня сярод прысутных у зале апроч Пятрухіна было пяць чалавек не з ліку міліцыянтаў, то ў другой палове – ніводнага. Астатнія ж грамадзяне стаяць у калідоры будынку суда. Уваход у саму залу ахоўваюць двое супрацоўнікаў АМАПу.
Беларускае Радыё Рацыя, Берасце
