Аляксандар Камароўскі: Стаўленне ўладаў да ветэранаў-афганцаў скрайне негатыўнае
Роўна 32 гады таму завершыўся вывад савецкага кантынгенту з Афганістана. Ветэран «Афгану», афіцэр баявой авіяцыі Аляксандар Камароўскі ацэньвае тую вайну выключна як злачынную й непатрэбную як у адносінах да афганскага народу, так і ў адносінах да савецкіх салдатаў і іх сем’яў.
Баявыя дзеянні ў Афганістане падобныя да тых, што зараз адбываюцца ў Данбасе. Стаўленне ўладаў Беларусі да ветэранаў Афганскай вайны скрайне нэгатыўнае, кажа Камароўскі:
– На ўсёй прасторы былога СССР у Беларусі, відаць, самае хамскае стаўленне да ветэранаў Афганскай вайны. Малодшы афіцэр, сяржант, прапаршчык, салдат – нароўні з грамадзянскім насельніцтвам у нашых паліклініках, бальніцах.
Узрост самых маладых удзельнікаў Афганскай вайны набліжаецца да 60 год. Па словах Камароўскага, у гэтым асяроддзі нярэдка здараюцца суіцыды.
– Напрыклад, у Жодзінскай арганізацыі было 200 ветэранаў. І вось сярод гэтых 200 чалавек – чатыры самагубствы. Гэта два адсоткі ад агульнай колькасці ветэранаў.
Паводле статыстыкі, у Афганскай кампаніі бралі ўдзел 30 577 беларусаў, з іх 789 загінулі, 12 зніклі бяз весткі, інвалідамі сталі 718 чалавек.
Стась Дадэрка, Беларускае Радыё Рацыя
Фота: novychas.by
