Аляксандр Швед: Лічу прысуд палітычна матываваным
Актывіст прафсаюза радыёэлектроннай прамысловасці Аляксандр Швед пакараны судом Баранавіцкага раёна і горада Баранавічы штрафам у 20 базавых велічынь. Фактычна – за раздачу газеты „Салідарнасць” каля прахадной завода ў Слоніме.
Але пратакол складзены за правядзенне пікета без дазволу. Газеты раздаваў Швед 31-га сакавіка, а пратакол складзены маёрам міліцыі Слонімскага РАУС Аляксандрам Навасадам 8-га красавіка завочна. Віны сваёй актывіст не прызнаў. Кажа Аляксандр Швед:
– Увогуле няма сведак, няма доказаў, у пікеце я не стаяў. Я распаўсюджваў дазволеную газету – гэта газета нашага прафсаюза “Салідарнасць”. І чаму такое рашэнне суддзі, я не ведаю. Я лічу гэты прысуд палітычна матываваным.
Сяброў прафсаюза РЭП з Берасця, якія там пікетавалі і трымалі плакаты, таксама судзілі, але абвясцілі папярэджанне. У той час як Аляксандр Швед, удзел якога ў пікеце зусім не даказаны судом, пакараны суддзёй Баранавіцкага раёна і горада Баранавічы Вольгай Раманюк вялікім штрафам.
Праваабаронцы ПЦ „Вясна” з Баранавіч Сяргей Гоўша і Аляксандр Вайцешык лічаць гэты прысуд незаконным.
Аляксандр Швед будзе рыхтаваць скаргу ў Берасцейскі абласны суд.
Беларускае Радыё Рацыя
Глядзіце таксама
