Анархісты, якія прыйшлі на мітынг БКДП у Кіеўскі сквер, затрыманыя
Як затрымалі анархістаў у нашым эфіры распавёў Андрусь Крэчка, які ад праваабарончага цэнтра «Вясна» назіраў за акцыяй:
– Яны пайшлі ў кірунку вуліцы Арлоўскай. За імі пайшла група міліцыянтаў у цывільным, дзесьці чалавек восем. Ужо на вуліцы Арлоўскай іх затрымалі і пасадзілі ў сіні “бусік”. Было паказана вельмі хутка пасведчанне, але гэта таксама невядома, ці яны прадставіліся. Ужо ў РАУСе нам паведамілі пра тое, што затрыманыя закрывалі свае твары, таму ім будуць выпісаны пратаколы.
Агулам затрымана трое чалавек. За акцыяй назіралі міліцыянэры ў цывільным, у тым ліку камандзір менскага АМАПу Дзмітры Балаба.
* * *
Затрыманыя анархісты, якія прыйшлі на першамайскі мітынг Беларускага кангрэсу дэмакратычных прафсаюзаў у Кіеўскі сквер, — экс-фігурант рэзананснага „справы графіцістаў” Вячаслаў Касінераў і двое яго паплечнікаў.
Анархісты прыйшлі ў сквер каля 14.30, праз паўгадзіны пасля пачатку санкцыянаванага гарадскімі ўладамі мерапрыемства. Апранутыя ў чорнае, яны расцягнулі транспарант „Свабода, роўнасць, раўнапраўе, самакіраванне”. Падчас выступу старшыні БКДП Аляксандра Ярашука Касінераў запаліў фаер, а затым пачаў выступаць праз мегафон. Анархіст, у прыватнасці, заявіў, што ў краіне застаюцца палітвязні.
Дзеянні Касінерава выклікалі незадаволенасць Ярашука і іншых удзельнікаў мітынгу. Некалькі чалавек падышлі да яго і папрасілі спыніць выступленне, пакуль кажуць іншыя. Найбольш актыўным быў лідар партыі „Справядлівы свет” Сяргей Калякін, які заявіў, што Касінераву заплацілі „за гэтую правакацыю”.
У выніку Касінераў спыніў выступ і папрасіў даць яму слова пазней.
Да анархістаў падышоў камандзір мінскага АМАПа Дзмітрый Балаба і папярэдзіў аб адказнасці за тое, што яны на санкцыянаваным масавым мерапрыемстве закрываюць твары медыцынскімі маскамі. Пры гэтым твар Касінерава быў адкрыты.
Прыкладна ў 15.00 ён хацеў узяць слова, аднак яго прапанову арганізатары акцыі праігнаравалі. Пасля гэтага анархісты згарнулі транспарант і накіраваліся ў бок вуліцы Арлоўскай. За імі пайшлі некалькі сілавікоў у цывільным, якія суправаджаюцца журналістамі і назіральнікамі ад праваабарончых арганізацый.
Каля тралейбуснага прыпынку, не прадстаўляючыся і не паказваючы дакументы, сілавікі затрымалі анархістаў. Адзін з іх сказаў, што прадстаўляе міліцыю ГУУС Менгарвыканкама, а Касінераў і двое іншых удзельнікаў акцыі затрымліваюцца для высвятлення асобаў. Усіх траіх без прымянення сілы пасадзілі ў сіні мікрааўтобус і павезлі ў невядомым кірунку.
belapan.by
